Page 17 - bon-dia-aruba-20210626

a17
celebridad Diasabra 26 Juni 2021

Paris Hilton ta expresa apoyo na Britney Spears durante bataya legal

(TMZ/TheNationalNews) - Paris Hilton a laga hopi cla na ken e ta
duna su apoyo den e caso di Britney Spears.

E celebridad a haci publico riba diahuebs anochi mientras e tabata dunando
un presentacion como DJ pa e gran apertura di e casino nobo den Las Vegas,
Resorts World Las Vegas.

Paris, ken a bisti un vestuario hopi similar na esun cu Britney Spears a usa
den su video musical pa e cantica “Toxic” den aña 2003, a bisa 6 palabra sim-
pel cu a causa furor den e pueblo y a duna un mensahe hopi cla “nos ta sti-
mabo Britney. Laga Britney den libertad”

Paris Hilton y Britney Spears tin historia, causando furor den aña 2006 du-
rante un salida hunto, haciendo cu e no ta bini como un sorpresa cu Hilton
ta apoya su amistad di hopi tempo caba.

Hilton a yega di haci comentarionan similar anteriormente, mas actual den
september di aña 2020, durante e programacion di radio SiriusXM cu Andy
Cohen como anfitrion, bisando “Mi ta stima Britney asina hopi. Mi ta sinti cu
si bo ta un adulto, bo mester tin derecho di biba bo mesun bida sin tin ningun
persona ta controla bo.”

Manera antes reporta, Britney Spears ta enfrentando un bataya legal pa por
haya bek e control pa cu tur e aspectonan di su bida. Britney Spears a ser poni
bao conservacion, cual den terminonan legal ta nifica cu corte a otorga un
otro persona control ariba tur e decisionnan monetario y personal cu e perso-
na en cuestion por haci, usualmente pa motibonan di desabilidadnan of edad
avansa, den e caso aki, Britney Spears ta bao conversacion di su tata Jamie
Spears, y algun otro personanan manera su terapista, manager y abogadonan.

Despues di un colapso mental severo cu Spears a experiencia publicamente
den aña 2008, corte den Los Angeles a pone su persona bao conservacion, mi-
rando cu den e aña anterior Spears a perde custodia di su yiunan pa e mesun
motibonan aki, y te hasta a ser interna den hospital psikiatrico 2 biaha den e
mesun aña. Despues di a determina cu Spears ta incapaz di haci decisionnan
pa su mes y maneha su fortuna independientemente, el a ser poni bao con-
servacion di su tata y algun otro personanan mas, inicialmente pa un periodo
temporal.

Algun luna despues di a ser poni bao conservacion, e hues a dicidi di extende
e conservatorio pa un tempo indefini, desde cu e decision aki a ser tuma,
e personanan den control di Britney Spears a otorga e permiso pa Britney
Spears por lansa 3 album, haci un aparicion como hues den e programa “THe
X Factor”, duna un gira mundial y te hasta a duna conciertonan frecuente pa
dos aña den Las Vegas. Despues di a caba e conciertonan aki, Britney Spears
a anuncia cu e lo ta “den retiro indefini” pa cu su trabao como artista y ce-
lebridad.
Pa añanan largo fanaticonan di Spears ta cuestiona e duracion y necesidad di e
conservacion, y si Spears tin acceso apropia na e fortuna cu el a genera den tur
e tempo aki. Considerando tambe cu na momento di a puntra Spears tocante
su opinion pa cu e conservacion algun luna despues den aña 2008 durante
un entrevista pa un documental di MTV, Spears a comenta “si mi no tabata
bao tur e restriccionnan aki, cu tur e dokternan, abogadonan y hendenan
analisando mi persona tur dia, mi lo sinti mi mes hopi mas libera”, agregando
“ora cu mi ta bisa nan con mi ta sinti mi mes, nan ta tende pero nan no ta
scuchami.”

Den februari, The New York Times a lansa un documental riba Fx y Hulu,
cual ta haci un recuento tocante e conservacion aki, poniendo mas atencion y
enfoke riba e situacion legal actual, revelando cu Britney Spears ya tin varios
aña purbando di termina e conservacion.

Diaranson pasa durante un sesion explosivo den corte, Britney Spears a de-
sahoga y a papia tocante su tata, su ekipo di administracion, terapista y abo-
gadonan. Revelando cu e ta asina disgusta cu e ta kere su famia a abusa di su
persona, te na e punto unda cu e kier demanda nan legalmente. Britney a
revela cu el a expresa su deseonan di casa y haya otro yiu, pero e conservatorio
a nenga su deseonan, y ta eherciendo un control asina intenso, cu e conserva-
dor no kier duna permiso pa laga Britney saca su anticonceptivo.

“Mi no ta akinan pa ta niun hende su esclavo.” Britney Spears a declara.
E atencion cu e documental aki a genera, a causa cu un movemento a cuminsa
cu e frase #FreeBritney como lema, causando protestanan den Los Angeles,
demandando pa saca Britney for di e conservacion. E manifestacionnan aki a
yama e atencion di American Civil Liberties Union, kendenan a ofrece apoyo
legal na e celebridad.