Page 20 - AHATA

A2 LOCAL
Diaranson 29 november 2023

OM: Sentencia den caso Oleander

Corte den Prome Instancia a dicta sentencia siman pasa den e caso
penal contra e sospechoso M.S.G.
G. ta wordo acusa di, como ambtenaar di Belastingdienst, a haci su
mes culpable di a tuma soborno.
Segun un comunicado di Ministerio Publico (OM), e sospechoso tabata per-
cura pa acelera pagonan di restitucion dor di duna cierto personanan trato
preferencial. Despues di pago di e restitucion, e sospechoso tabata pidi pa un
contribucion monetario pa e servicio extra cu el a duna. E investigacion aki, cu
Landsrecherche a cuminza na 2022, ta conoci como Oleander.

Huez a condena G. pa un castigo di trabao di 140 ora y un castigo di prison

condicional di un luna. Fiscal di husticia a exigi tambe pa G. wordo saca di e
derecho pa traha como ambtenaar pa un periodo di tres aña. Huez a mustra
comprension pa e exigencia aki di fiscal, pero no a sigui cune, considerando
e circunstancianan personal di e sospechoso, kende mientrastanto a perde su
trabao na Belastingdienst.

Ministerio Publico lo sigui bringa corupcion. E ciudadano mester por confia
cu ambtenaarnan ta integro y ta trata tur hende igual. Ora un ambtenaar saca
bentaha personal dor di duna cierto personanan trato preferencial, e confianza
di ciudadanonan den integridad di ambtenaarnan ta wordo atacha. Juist di un
ambtenaar por expect cu e ta actua na un manera integro y ta tene su mes na
ley, segun OM a conclui den nan comunicado di prensa.

CBS: Prijs promedio di electricidad pa vivienda ta 274.57 florin

Recientemente, Oficina Central di Estadistica di Aruba (CBS) a pu-
blica su Indice di Prijs di Consumo (CPI) pa luna di october ultimo.
Por a nota cu maske tabatin un reduccion den e prijs promedio pa bari
di petroleo, e prijs di electricidad cu awa no a conoce cambio.

Prijs di utilidad (electricidad y awa), gasolin y diesel ta wordo determina pri-
mordialmente door di e prijs internacional di petroleo. Na October 2023 e
prijs promedio pa bari di petroleo (US$ 85.94) a conoce un caida di US$ 2.17
(2.5%) compara cu September 2023 (US$ 88.11).

Prijs di electricidad y di awa no a cambia compara cu September 2023. Conse-
cuentemente, e prijs promedio di electricidad pa vivienda a keda Afl. 274.57,
mientras cu e prijs promedio di awa pa vivienda a keda Afl. 168.73.

Prijs di gasolin a registra un caida di Afl. 5.80 cen (-2.0%) na October 2023 y
a causa un efecto di -0.11 ppt riba e CPI. Prijs di diesel a registra un subida di
Afl. 9.10 cen (3.6%) na October 2023 y a causa un efecto di 0.01 ppt riba e CPI.

Na October 2023, utilidad, gasolin y diesel como grupo, tabatin un caida di
prijs di 0.5% compara cu September 2023 y hunto tabatin un influencia di
-0.10 ppt riba e CPI, mientras cu e restante 404 bienes y servicio hunto, a con-
oce un subida di prijs di 0.3% y tabtin efecto un efecto di 0.23 ppt riba e CPI.