Page 5 - ATA

DESPA Un caso isola sin impacto riba suministracion
general di awa

Sunday, 21 February 2016 00:32
Tweet
Comparti

Departamento di Salud Publico ta na altura cu recientemente diferente turista y trahadonan a bira malo
cu dolor di cabes, dolor di stoma y sacamento despues di a bebe awa di cranchi na un hotel. Seccion di
Higiena di Departamento di Salud Publico ta determinando e situacion na e momentonan aki, door di
tuma contacto cu e diferente instancianan di cuido y profesionalnan riba e tereno aki.

Departamento di Salud Publico hunto cu e representantenan di e resort a organisa un accion urgente pa
alivia e situacion y a tuma tur e medidanan necesario pa contene y coregi e daño mas lihe posibel. E
sistema di awa potabel di e resort a wordo trata bou di guia di Departamento di Salud Publico. Por
informa cu e investigacion a demostra cu e contaminacion di awa a sosode riba tereno di e hotel mes y no
cu e awa a yega na e resort contamina. Departamento di Salud Publico a haci test microbiologico na e red
di tuberia general di awa di WEB y a conclui cu e calidad di awa ta completamente segun norma.

Awor aki Departamento di Salud Publico ta colectando tur informacion di esunnan cu ta presentando cu
e sintomanan di dolor di cabes, dolor di stoma y sacamento, pa establece un link clinico epidemiologico.
E hotel conhuntamente cu Departamento di Salud Publico lo bay establece causa di e contaminacion di
awa. Lo laga X-ray e sistema di tuberia cu ta bou tera pa por saca afo unda e contaminacion por ta. A
involucra PAHO pa duna asistencia mas pronto posibel cu un experto pa contene e situacion mas lihe y
completo posibel.

Departamento di Salud Publico ta enfatisa cu na momento cu un persona bira malo cu sacamento y/of
diarea y ta sospecha cu e por a come of bebe algo cu tabata contamina, pa acudi cerca su dokter di cas.
Tur dokter di cas tin e obligacion di meld esaki na Seccion di Malesanan Contagioso di Departamento di
Salud Publico. Pa di e forma aki Departamento di Salud Publico por tin un miho bista riba e casonan di
contaminacion y por eherce un investigacion mas rapido y eficiente posibel. Pa mas informacion por
tuma contacto libremente cu Departamento di Salud Publico na tel. 5224200.

Ta enfatisa cu e contaminacion ta isola na e hotel so y no ta den sistema di suministracion general di awa
di WEB. E sistema di tuberia di WEB ta diseña di tal forma cu dificilmente un contaminacion isola por
bay bek den e tuberia di WEB. Den WEB su red di tuberia tin punto di control cu ta cera e sistema pa
evita contaminacion di e suministro general. Regularmente tanto laboratorio di WEB como
Landslaboratorium ta test awa di bebe na puntonan strategico den e red di distribucion di WEB bou guia
di e seccion di Higiena.

Ta bon pa sigura comunidad cu tur instancia concerni, esta Departamento di Salud Publico, WEB y
Aruba Tourism Authority tin e situacion aki como prioridad y ta trahando conhuntamente pa soluciona e
situacion cu a presenta.

http://www.24ora.com/local-mainmenu-5/105527-despa-un-caso-isola-sin-impacto-riba-
suministracion-general-di-awa