Page 9 - DIARIO 22 NOVEMBER 2021 COMPLETO.indd

DIALUNA 22 NOVEMBER 2021 DIARIO PAGINA 9
Proyecto nobo lanza pa
Telefon pa Hubentud pa

stimula discusion den famia

ORANJESTAD (AAN): Bon noticia for di Telefon pa
Hubentud, ta cu nan ta lanzando un proyecto nobo.
Riba 20 di November mundo henter ta celebra e dia di
Derecho di Mucha. Ariba 20 di November 1989 e tratado di
Derecho di Mucha a ser adopta pa Nacionan Uni. Y ariba 20 di
november 1999 tabata e dia cu prome biaha un mucha a tuma
contacto via e number di telefon 131 cu Telefon pa Hubentud.
Den cuadro di esaki Fundacion Telefon pa Hubentud Aruba a
celebra dia nacional y International di Derecho di Mucha y su
22 aniversario.
Pa 22 aña caba Fundacion Telefon pa Hubentud Aruba ta
presenta ariba e dia aki un proyecto pa e aña benidero. E aña
aki no lo ta otro. Un di e proyectonan cu Fundacion Telefon
pa Hubentud Aruba a presenta ta “My Life, My Chance”.
Aña 2020 a habri cu dos asesinato caminda tur dos sospechoso
tabata menor di edad. Tur dos caso a shock Aruba. Tabata dos
caso cu tabatatin Aruba completo papiando. Comportacion
di hoben, norma y valor, educacion di nos hobennan, tabata
temanan di combersacion. Algun reaccion tabata: Con esaki
por ta posibel? Nan no a worde bon educa, E mayornan ta
fout, Gobierno ta fout, Nan ta usa droga etc.
Basa riba esaki Fundacion Telefon pa Hubentud Aruba a
crea e proyecto “My Life, My Chance”.
DIARIO a compronde cu “My Life, My Chance” ta un
programa cu lo pasa na television y media social cu un famia
completo por mira. Atravez di My Life, My Chance e discusion
den famia ta ser stimula. My Life, My Chance ta duna un bista
den posibel consecuencianan na momento cu un hoben tuma
un decision cu por resulta bon of menos bon.
“Di come Breba pa come Caviar”. Via di lensnan di camara
nos lo haya un bista den bida di tres hoben cu no tabata
tine facil den bida door di un decision cu nan a tuma. Otro
tres hoben cu nan decision si a resulta bon tambe ta duna
nos un bista den nan bida. Durante 6 episodio e hobennan
ta concientisa e muchanan, hobennan y mayornan di Aruba
tocante e resultado di un decision bon of menos bon. Pa loke
ta e hobennan, mester pensa di un hoben artista te cu un hoben
cu ta biba riba caya.
Pa mas informacion tocante My Life, My Chance por tuma
contacto cu Fundacion Telefon pa Hubentud Aruba via nan
website: 131.aw of tambe Instagram: 131aruba