Page 10 - AM210421
P. 10
10 AWEMainta Diaranson, 21 April 2021
Colegio Hilario Angela den preparacion pa su Hofi Amistad
HOPI t’e scolnan cu ta interesa pa por tin un hofi p’asina nan por
cultiva. Esaki tambe lo forma parti di nan les durante aña escolar. E ta
un proyecto cu a cuminsa na 2019 y awe keto bay tin scolnan interesa
den e proyecto aki.
Durante cominenso di siman pasa e docentenan di Colegio Hilario
Angela a haci un bishita na departamento di Agricultura, Cria y Pesca
Santa Rosa p’asina haya un presentacion di kico lo t’e tareanan basico
di plantamento.
Esaki a wordo duna dor di sr. Ludwig Rasmijn p’asina e docentenan por
pasa e conocemento aki pa nan alumnonan di Colegio Hilario Angela
pa crea nan Hofi Amistad. Tabata un dia completo di enrikese mas nan
conocemento di tur locual ta ensera plantamento p’e docentenan cu sigur
di nan parti a haya esaki hopi interesante.
Ta den fin di e siman cu ta tras di lomba di parti Santa Rosa a haci
un bishita n’e scol Colegio Hilario Angela pa duna un presentacion di
plantamento basico n’e alumnonan.
Aki sr. Ludwig Rasmijn y sr.Randy Maduro a percura p’e presentacion
pa tur e klasnan di e scol. E muchanan a disfruta di esaki y tur mucha di
e scol a ricibi nan pochi, gordura y simiya y a practica nan plantamento.
Awor nan ta bon prepara y tin conocemento con pa atente cu nan simiya
y mata pa nan bay planta y crea nan Hofi Amistad.
Riba e mainta aki Minister encarga cu Sector Primario sr. Chris Romero
tambe a haci un bishita n’e scol cu su persona mes a bishita den su
hubentud cu ta Colegio Hilario Angela pa mira e desaroyo di e Hofi
Amistad.
E cabesante di Colegio Hilario Angela, sra. Cornelia Aventurin-Connor
hunto cu docente sra. Shaneila Geerman ta encarga cu e proyecto a ricibi
Minister Chris Romero p’asina por a mira e desaroyo y kico tur a wordo
haci y ta bay wordo haci p’asina realisa e Hofi Amistad aki di dicho scol.
Despues Minister Chris Romero a pasa den e klas cu tabata hayando e
presentacion na e momento ey pa dirigi algun palabra di encurashamento
n’e alumnonan y felicita nan cu nan hofi cu pronto lo wordo finalisa.
Den nomber di Minister sr. Chris Romero conhuntamente cu Santa Rosa
ta desea e scol Colegio Hilario Angela hopi exito cu nan Hofi Amistad y
pronto nos por mira nos muchanan por cosecha e fruto di nan Hofi.
