Page 2 - YMCA

AWEMainta Diamars, 10 October 2017 13

Hobennan a disfruta di

YMCA’s October Camp

DURANTE e siman di 2 pa 6 di october 2017 un cantidad grandi
di mucha y hoben a bin hunto pa participa den e tradicional October
Camp di YMCA Aruba.
E evento ta consisti di tres grupo, un grupo di mucha di 4 pa 7 aña
di edad, un grupo di 8 pa 11 aña di edad y un grupo di hoben cual a
consisti di hoben cu un edad di 12 pa 17 aña.
Ambos localidad, esta YMCA Dakota y YMCA San Nicolas a acepta
participante p’e tres gruponan menciona.

E camp a resulta exitoso, unda tur participante a disfruta di diferente
actividad.
YMCA Aruba a percura pa tene un schedule varia cu diferente sorto
di actividad, por ehempel deporte, cooking and baking, arts & crafts
y actividadnan unda e muchanan y hobennan ta desaroya habilidad
pa traha den team y pa comunica na un manera efectivo.

E actividadnan no lo tabata posibel sin e ayudo y guia cu e muchanan
y hobennan a ricibi for di e staf di YMCA, como tambe e grupo grandi
di boluntario. Kende por cierto a haci un tremendo trabou guiando e
participantenan.

YMCA Aruba ta gradici su staf y boluntarionan kende a yuda haci e
Camp aki posibel.
Tambe YMCA Aruba ta gradici tur mayor, mucha y hoben cu a confia
den nan organisacion. Hunto nos ta enfoca ariba nos hobennan y nos
ta crea lidernan den nos comunidad.

YMCA Aruba ta recorda mayornan pa inscribi na tempo p’e siguiente
Camp cual lo tuma lugar den April 2018.