Page 12 - HOH

E biaha’ki tabata Sindicato di Trahadonan den Cuido (ABV) cu a dicidi di splica pakico

nan a tuma e posicion contra legalisacion di marihuana.

Presidente di ABV Gina Maduro, kende ta trata den seccion di emergencia di hospital,

unda tur hende malo di gravedad ta yega pa haya ayudo. Como ABV, el a cuminsa pa

splica, no por bisa cu nan ta totalmente contra. Pasobra tin un grupo cu ta pro y otro cu ta

contra. Esnan cu ta pro ta boga pa e cannabis medicinal, specialmente pa e pashentnan di

cancer. E division ta den e parti recreacional. Principalmente bou di hobennan cu no ta

controla esaki y ta bay abusa di dje, cuminsando for di 12 aña of menor.

Di otro banda, como enfermero, el a bisa, nan ta keda confronta diariamente cu casonan

bou di hoben- y adultonan, pero tambe bou di turistanan. Por mira e abuso cu ta tumando

luga y e consecuencianan grave cu esaki ta trece cun’e. Pero tambe division cu e ta trece

den famia, y muchanan cu ta bandona nan estudio. P’esey e miembronan di ABV ta

dividi riba e tema aki.

Maduro a bisa cu e parti medicinal no tin problema, pero cu e parti recreacional si. E

hendenan no sa con pa anda cu e parti aki y no tin e informacion of educacion riba e parti

aki. Den KPA, unda ta envolvi diariamente cu e problema aki y tambe na scol, unda

muchanan ta bini bou influencia di droga.

Hopi ta esnan cu a yega emergencia pa ayudo ta pasobra nan a uza mal cos y ta haya

halucinacion. Nan ta trata di purba algo cu no ta bon y ta haci mal efecto riba nan.

Semper na nan yegada cu problema asina, ta haci test di droga y ta constata cu tin rastro

di marihuana den nan sanger.