Page 35 - LOTTO

Wega final di futbol ta entre SV RCA y Deportivo Nacional

Wednesday, 21 June 2017 17:17
Comparti

Diamars anochi e comision di apelacion (Beroepscommissie) di Arubaanse Voetbal Bond (AVB) a reuni
riba e protesta di Deportivo Nacional contra e decision di directiva di AVB, relaciona cu e ultimo wega
hunga den liga “Division di Honor” entre SV Dakota y Deportivo Nacional.
Despues di deliberacion interno, e comision a duna Deportivo Nacional rason den nan ponencianan y
como tal e wega final pa e titulo di campeon lo bay entre SV RCA y Deportivo Nacional. Directiva di AVB
mes no a participa den e decision aki pa dos motibo. E prome ta pasobra Beroepcommissie ta traha
independiente. Y e di dos motibo ta pasobra cu e protesta ta contra e decision di directiva di AVB mes. Pa
awor, e decision aki ta final, tanto pa Deportivo Nacional como pa directiva di AVB. Lo cuminsa prepara
pa organisa e weganan final, despues di e 4 dianan cu ta stipula pa regla. Probablemente e prome di e tres
weganan lo cuminsa otro siman. A funda Arubaanse Voetbal Bond na aña 1932 y a afilia na CONCACAF
na aña 1986 y despues na FIFA na aña 1988. E ta e organisacion cu ta maneha futbol amateur y
profesional riba nos isla, incluyendo e muchanan, hoben, hende muhe y adultonan. E ta responsabel pa
sanciona e refereenan y e torneonan di futbol organisa pa mayoria liga. Nan oficina ta situa den
Compleho Deportivo Frans Figaroa na Noord.