Page 3 - DIGICEL

Djaweps 16 Novèmber 2017 5
A base di monitòr di konyunktura 2017:
Kámara ta antisipá e

aña aki un kaida den e

konyunktura ekonómiko

Ekonomia lo kremp ½% pa fin di e aña aki

WILLEMSTAD - Despues
di un periodo di dos aña di un
rekuperashon kuidadoso di
e konyunktura ekonómiko,
Kámara di Komèrsio i
Industria a antisipá pa e
aña aki un kaida den e
konyunktura ekonómiko. E
promé mitar di 2017 ainda
ta logra un kresementu di
¼%, pero e espektativa ta ku
2017 ta sera den kòrá.
Despues di e promé
kuartal di 2014 ekonomia
a rekuperá pokopoko i a
alkansá den e di dos mitar
di 2016 sifranan positivo di
kresementu. Esaki tabata
spesialmente danki na un
oumento di e gastunan di
gobièrnu, tantu pa loke
ta invershonnan komo pa
konsumo, i na konsumo
privá. A sera e aña 2016 ku
un kresementu di 0.7%.
Den e di kuater kuartal
di 2016 e kaida di e
konyunktura ekonómiko
a manifestá kaba i esaki a
kontinuá den e promé mitar
di 2017. E kaida ta debí
na desaroyonan relashoná
ku invershonnan privá,
turismo i konstrukshon. E
indikadornan makro (entre
otro ‘omzetbelasting’,
‘loonsom’) ta konfirmá un
kaida den ekonomia den e
promé mitar di 2017.
Ta antisipá ku e desaroyo
aki ta sigui den e di dos mitar
di 2017. Segun e plannan
di presupuesto di gobièrnu
den e di dos mitar di 2017,
e oumento di e gastunan
di gobièrnu ta baha. Ta
sperando ku e invershonnan
privá lo no rekuperá promé
ku fin di aña. E indikadónan
makro ku ta disponibel no ta
mustra niun rekuperashon
di e gastunan konsumptivo
privá. Desaroyonan positivo
por spera den turismo,
tantu pa loke ta okupashon
di hotèl, komo den turismo
krusero. Den e pronóstiko
di e kresementu ekonómiko
na fin di 2017 ta presumí
ku e nivel di produkshon na
refineria lo stabilisá.
A base di e desaroyonan
aki ku ta vislumbrando,
Kámara di Komèrsio ta
antisipá ku ekonomia lo
kremp ½% pa fin di e aña
aki.