Page 19 - ATA

Minister agradecido di por forma parti di Aruba su trayecto
como destinacion

Publication: Thursday, 24 September 2015. Categoria: General

Riba dia internacional di Turismo

ORANJESATD (AAN): Diaranzon Aruba a celebra dia internacional di turismo. PA e ocasion
special aki a tuma luga un evento special dedica na e partnernan strategico di e industria
importante aki. Durante e celebracion den e ballroom di Marriott, Minister di Turismo,
Transporte, Sector Primario y Cultura, Sr. Otmar Oduber, a hiba palabra.

E mandatario a inicia su discurso dunando un palabra di pabien na cada un persona cu ta forma
parti di e pilar economico mas importante di nos isla, cual ta turismo.

Sr. Oduber ta bisa “Mirando e rol importante cu turismo tin riba nos isla, cada un miembro di nos
comunidad ta forma parti di e industria dinamico aki sea directamente of indirectamente. Na
2014, turismo internacional a alcansa e record di 1.133 biyon turista mientras cu Aruba a alcansa
nos propio record di 1 miyon bishitante. Esaki tabata un esfuerso conhunto di cada un di e
partnernan y nos comunidad en general. E ta posibel danki na boso dedicacion y trabao duro cu
nos ta gosa di un turismo asina prospero y ta e hospitalidad y amabilidad ta locual ta haci nos
bishitantenan sinti na cas riba nos One Happy Island.”

Minister Oduber ta comparti cu pa Augustus 2015 e cifranan di stay-over a aumenta cu 14.8%. E
Year to Date di e mercado Mericano tambe a aumenta cu 8.5% y e mercado Venezolano a
aumenta cu 49.9%. E Minister di turismo a remarca cu mester reconoce cu e mercado Mericano,
cual ta un di nos mercadonan principal, a conoce un aumento apesar di e situacion actual di nos
pais bisiña cu sigur tin su impacto riba e cifra di YTD pa e luna di Augustus.

Pa locual ta trata turismo crucero nos a yega e cifranan di mas halto den historia cual ta 688.472
bishitante na aña 2013. Den 2014 nos a experencia un caida y nos ta spera cu pa 2015 nos cera
cu un caida di 9%. Minister Oduber a sigui bisa: “Mientrastanto pa 2016 nos ta mira un aña
prominente y pa prome biaha nos lo por kibra e record alcansando 700.000 turista di barco
crucero, un aumento di 14.8% compara cu 2015. Ansiosamente nos den espera di esaki.”