Page 7 - AWEMAINTA
P. 7
Diabierna, 20 December 2019 AWEMainta 7
Atrobe placa criminal intercepta na Aeropuerto
TABATA diarazon ultimo, cu Recherchenan di Afpakteam a detene un homber
Arubiano di 19 aña di edad na Aeropuerto riba sospecho di labamento di
placa.
E sospechoso a bin di Merca y tabatin un total di $ 13.213,– den su poder.
Aunke ta su deber, e no a informa nada di e placa aki na Aduana. Asina
vocero di Ministerio Publico a duna di conoce den un comunicado.
A dicidi di haci un control y como cu e tabata contradeci su mes den su
contestanan na Aduana, a dicidi pa tuma contacto cu Afpakteam.
Recherchenan di Afpakteam a procede cu detene riba sospecho di labamento
di placa. Investigacion di Afpakteam a mustra cu e sospechoso no por a splica
di unda e placa tabata bin y despues el a tuma distancia tambe di e placa.
E placa lo bay den Fondo di Criminalidad (Criminaliteitsbestrijdingsfonds).
Placa di e fondo ta wordo usa pa bringa criminalidad na Aruba.
Afpakteam di Aruba kier aporta visiblemente n’e fondo aki. Afpakteam ta
un ekipo di cooperacion entre Ministerio Publico, Cuerpo Policial di Aruba,
Cuerpo di Aduana di Aruba, Fiot (Fiscale inlichtingen- en opsporingsteam)
di Departamento di Impuesto (DIMP), FIOD (Fiscale Inlichtingen- en
Opsporingsdienst), Koninklijke Marechaussee (KMar), Kustwacht Steunpunt
Aruba, Meldpunt (Meldpunt Ongebruikelijke Transacties) y RST.
E trabao ta dirigi riba combati criminalidad financiero economico. Crimen no
por paga! Afpakteam ta trahando for dia 1 di maart 2017. Por acerca e team cu
informacion tocante señalnan di posible labamento di placa via: afpakteam@
kparuba.com of via tiplijn 11141.
