Page 54 - KPA 13 April'15

Comparti

Diabierna ultimo tabata un dia hopi tristo pa Cuerpo Policial Aruba, cu mester a despedi di nan mesun
colega, cu tabata envolvi den un accidente fatal dialuna marduga. Andre Solagnier tabata trahando como
“Specialist v/d Sectie Centrale Meldkamer v/h Korpsonderdeel Bijzondere Politie Diensten” y a fayece cu
e rango di “Hoofdagent van Politie 1ste klasse”.
“Andre Solagnier a drenta Scol pa Polis dia 1 di augustus 1989 y mi tambe a forma parti di su klas”, asina
Alto Comisario di Polis, mr. Adolfo "Dolfi" Richardson a inicia su discurso durante despedida di e agente
policial den Olive Tree Home. "Mirando e cantidad di colega Polis cu a bin tuma despedida di dje, no tin
ningun duda cu Andre tabata masha keri pa su coleganan", asina e hefe di Polis a sigui bisa.
Su actitud semper positivo, corecto, amabel, servicial pero principalmente respetuoso, ta cualidadnan cu
precisamente Mando Policial ta buscando ultimo añanan den nos hobennan cu ta aplica pa bira Polis. Ta
obvio cu e training na Scol pa Polis so no ta suficiente pa por crea e Polis ehemplar cu comunidad ta
desea.
E fayecimento di Andre Solagnier a causa un impacto enorme riba tur Polis. "Mi ta mira esaki como un
señal cu nos mester realisa nos mes cu di un momento pa otro bo bida por cambia drasticamente. Y laga
nos reflexiona riba nos bida na mundo y haci nos esfuerso pa biba bon cu otro. Pa ora nos mester laga e
mundo aki, cu nos no tin nada di lamenta”.
E agente policial Andre Solagnier a trata tur hende semper na un forma corecto y cu respet. E tabata un
hende di caracter positivo y alegre. Ta pesey tambe e ta gosa di e respet bek di tur su coleganan. "Laga
Andre keda e ehempel di trata otro mescos cu lo bo kier pa hende trata bo".
"Andre a bay laga nos di un forma inespera y na un manera tragico. Personalmente mi ta kere cu no tin
palabra pa expresa na e momento aki cu lo por consola su famia, sernan keri y suavisa e dolor inmenso
cu el a bay laga atras", di acuerdo cu Alto Comisario mr. Dolfi Richardson.
E dolor cu ta biba den henter Cuerpo Policial Aruba ta grandi cu e perdida aki. Mando Policial ta lamenta
cu e tristesa no ta solamente pa motibo cu a perde un bon amigo y colega pero tambe pasobra a perde 26
aña di experiencia Policial.

Comentarionan (1)