Page 60 - MIN VOS 15 MAART 2016
P. 60
Hospital a bishita scolnan basico durante Siman di Riñon
Monday, 14 March 2016 10:03
Comparti
Aruba ta un pais cu un indice halto di enfermedadnan cu ta afecta e riñonnan y particularmente durante di e siman
rond di Dia di Riñon (World Kidney Day), esunnan cu ta traha cu pashentnan di enfermedadnan di riñon a organisa
diferente actividad di conscientisacion.
Como cu e tema internacional e aña aki a enfoca riba muchanan y enfermedadnan di riñon, pa motiva cambionan
positivo pa preveni enfermedadnan di riñon na adulto, e Clinica di Dialyse di Dr. Horacio E. Oduber Hospitaal a
bishita cuater scol pa intercambia cu e muchanan encuanto di e miho cuido cu nan por duna nan riñonnan y pakico e
ta asina importante pa cuida nan riñonnan. Raysa Carolina, nurse specialisa den dialyse a splica cu meta principal ta
pa conscientisa e muchanan for di un edad hoben di e importancia di custumbernan saludabel pa nan logra
mantenen nan riñonnan saludabel y preveni e enfermedadnan di riñon. Nurse Carolina a agrega cu e acogida cu nan
a haya di parti di muchanan na e scolnan cu nan a bishita tabata tremendo y ta refleha tambe con e muchanan ta
habri pa informacion positivo cu ta yuda den nan desaroyo.
Durante di nan bishita na klasnan 4 y 5 di Pieter Boerschool, klas 4 di Scol Primario Washington, Scol Primario
Kudawecha y klas 4 di Maria School, e nursenan a duna un splicacion di e apariencia di e riñon y kico e funcion di e
riñon ta den e curpa. Ademas, nan papia y intercambia cu e muchanan tocante di topiconan manera cuido di riñon,
incluyendo nutricion y custumbernan sano. Prevencion tempran ta cuminsa cu e muchanan y e team di informacion a
keda impresiona pa e conocemento di e muchanan y e interes cu nan tin pa siña mas tocante di cuido di riñon y
prevencion di malesa. Nurse Carolina a splica cu despues di cada sesion a evalua cu e juffrouwnan e informacion
duna y e "feedback" tabata en general cu a informacion tabata apto pa e edad di e muchanan, y cu nan a compronde
bon. E team a keda hopi sorprendi pa loke e muchanan ya tabata sa caba y di nan contestanan na final di e sesion,
Nurse Carolina a conclui bisando.
