Page 3 - ARUPARKING 17 OCT 2015

Mirando cu na cuminsamento di e proyecto, hopi hende a pidi pa nos tene consideracion cu diferente aspecto
di e tarifanan, nos a dicidi despues di algun siman di operacion di trece un ahuste den e tarifanan pa asina por
ta mas atractivo pa un y tur. A pone cu por paga 1 florin pa 30 minuut y tambe 2 florin pa 1 ora y mey. Tambe
a baha e tarifa mensual pa esnan cu tin Werk Parkeervergunning cu 20 % caminda e la bira Awg 60,- pa luna.
A introduci e Aruparking Smartcard pa haci pagonan mucho mas facil pa no mester cana cu placa larga
tampoco y caminda cu Smartcard semper por paga e suma exacto cu mester. Entretanto ta bezig cu banconan
tambe riba posibilidadnan pa uza Credit card y Debit cards. E mashinnan tambe ta tuma tur coins di dollar
Mericano, pa asina ta mas facil pa e turistanan, solamente e mashin no ta acepta ningun placa di papel.
Encuanto siguridad a busca compania di siguridad cual lo t’ey na e areanan unda lo por tin menos siguridad for
di 7or di mainta te cu 12 or di anochi pa asina yuda controla e autonan y tambe esnan cu ta bay busca nan auto
cual ta para eynan sea durante ora di trabao of ora nan bay shop den caya grandi. A papia tambe cu nos
companianan di utilidad caminda lo bay pone luznan grandi na e luganan menciona, pa esaki tambe yuda pa tur
hende cu a parkeer nan auto por ta mas sigur lagando nan auto atras y tambe na momento di bay bek pa busca
nan auto.
Splicando un biaha mas e parti di parkeer auto y bay haci compras, mester menciona cu no mester bay bek na e
mashin original pa añadi tempo, mirando cu riba e recibo existente cual bo ta keda cu ne na momento di paga
pa parkeer, por recarga bo tempo extra na cualkier mashin cu ta mas cerca dibo na e momento ey uzando
simplemente e number di e recibo. Tambe nos kier splica cu den caya principal mes lo bin algun mashin cual
lo haci hopi mas facil na momento di haci compras y mester recarga bo espacio di parkeo. Aruparking ta
trahando tambe riba un App pa telefon caminda na un manera masha facil por cumpra of añadi tempo na bo
espacio di parkeo via bo celular.
AruParking ta existi desde November 2014 y ta un compania perteneciendo na Arubus. Nan tin 25 empleado
den servicio, parti entre parkeerwachters y personal administrativo. AruParking ta maneha riba 1300
parkeerplaats den henter e area di Oranjestad, di cual mas o menos 800 ta pa clientenan cu ta bishita e area pa
haci compras of haci respondi. E resto di espacio ta reserva pa empleadonan den e area, cu no necesariamente
mester staciona nan auto mucho cerca debi cu nan auto ta keda ey pa mas di 8 ora largo. Mester paga di
dialuna pa diasabra entre 7:00am pa 7:00pm.