Page 4 - POST ARUBA 22 DEC 2015

December 2015 Pagina 25

Despues di 33 aña den servicio na Servicio Postal

Norwin Calmera a baha cu un pensioen bon mereci

Recientemente a tuma luga despedida di Norwin A.J.
Calmera for di Post Aruba NV, despues di 33 aña den
servicio. E evento pa despedi di e empleado ehemplar
aki a tuma luga na e sucursal di Post Aruba N.V. situa
na San Nicolas.

Norwin Calmera a cuminsa su carera como
“brievenbesteller” dia 1 di maart 1982 y a pasa door
di diferente posicion for di e tempo ey. Asina por
menciona cu el a funciona como “klerk 1ste klasse”,
despues a crece y bira “adjunct commies”, a progresa
den “Hoofdklerk”, despues a subi pa “kantoorhouder” y
te ultimo e tabata trahando como “Hoofdkassier”.

Empleadonan di Post Aruba N.V., pero specialmente
esunnan cu ta traha directamente cu Norwin Calmera a
reuni hunto pa despedi di dje, awo cu e ta bay disfruta
di su pensioen, cu ta drenta na vigor dia 26 di december
proximo.

Durante e evento cortico a expresa cu sin duda lo bay
sinti su falta, specialmente pa e experencia cu el a gana
den 33 aña di servicio y pa su actitud asina cordial pa
cu su coleganan y specialmente cu clientenan.

A funda e compania priva Post Aruba N.V. na aña 2005.
Su oficina principal ta situa na J.E. Irausquin Plein # 9
na Oranjestad y tin 3 oficina adicional na Santa Cruz,
Noord y San Nicolas. Ey ta ofrece tur tipo di servicio, for
di manda un envelop, te na carga pisa, sin lubida nan
servicio di manda placa via Western Union.

Post Aruba N.V. ta conta cu 111 empleado, cu
diariamente ta yega na 42 mil adres situa tur rond di
nos isla. Mas cu djis un servicio, e empleadonan atento
ta percura pa tanto comunidad como sector comercial
por comunica cu otro.

Pa mas informacion riba servicionan di Post Aruba N.V.,
bishita e website www.postaruba.com of check nan
paginanan riba Facebook, cu ta E-Post Aruba y Aruba
Stamps.