Page 39 - MIN SOC, April 29 2015

Minister Paul Croes a uni cu Plataforma pa Personanan cu Limitacion pa
celebra Dia di Rey y pa yuda recauda fondo

 Apr 29th, 2015
 Local

Den Reino completo a celebra dia di Rey 2015. Aki na Aruba no tabata un excepcion, tur hende
tabata celebra den nan forma e dia special aki. Comision di Plataforma Pa Personanan cu
Limitacion (PPL) tambe a organiza un dia diferente unda cu personanan cu tin un of otro
deficiencia fisico, mental, visual, auditivo of otro forma di limitacion tambe a bini hunto y
celebra e fecha natalicio di Rey Willem Alexander.
Renaissance Market Place tabata yena cu personanan cu a demostra nan apoyo na e 8000
personanan cu tin un of otro limitacion aki na Aruba. Nos Rey Willem Alexander a uni bao di un
solo capa nos islanan den Caribe pa su celebracion y ta p’esey mes a scoge e dia aki tambe pa
trece union entre esunnan cu ta sufri di un limitacion y nos comunidad. Ta pa e personanan aki,
cu mester nos apoyo y nos aceptacion, comision PPL a scoge e dia riba e fecha natal di nos Rey
Willem Alexander pa demostra e union aki.
Minister Paul Croes kende ta e motor tras di e iniciativa aki tabata contento di mira e cantidad di
personanan cu a atende e actividad aki y kier a gradici tur cu a contribui cu e comision y nos
hendenan cu limitacion. “Mi kier a gradici un persona en particular cu ta sr. Harry Koeman,
kende un dia sinta cu mi den oficina hunto cu mi persona a bin cu e idea pa haci e fiesta nacional
aki un celebracion special. Dialuna nos por a mira un colaboracion completo entre Renaissance
Market Place, tur e tienda y restaurantnan aki dunando apoyo na comision Plataforma Pa
Personanan cu Limitacion”. Esey tabata palabra di satisfaccion di Minister Paul Croes. Na final
di e evento Minister Croes a gradici tur cu di un forma of otro a colabora pa haci e evento aki un
exito y a pidi un danki special na e staff di Casa Tua cu a colecta un bunita suma pa un donacion
na PPL.