Page 54 - MIN ARENDS 16 JUNE 2017

"SETAR ta un paso dilanti di e siguiente desaroyo den
innovacion"

Thursday, 15 June 2017 19:01
Comparti

Minister di Economia, Transporte y Comunicacion mr. drs. Richard Arends a haci un bishita di trabou na nos
compania estatal di comunicacion SETAR. Compaña pa director ing. Roland Croes, Minister a haya un splicacion
detaya di cada departamento di SETAR.

E recorido a cuminsa den e edificio grandi y hermeticamente cera pa e mundo eyfo den Hendrikstraat. Minister a
cera conoci cu e curason y ‘brain’di e compania.
Despues di e bishita den e bunker den Hendrikstraat a sigui pa SETAR na Sero Blanco unda Minister
Arends a pasa den delaster un departamento y haya splicacion amplio di tur loke ta sosode den nan.
Minister Arends, conoci pa semper ta habri pa expande su conocemento, tabata masha interesa den e
trabounan cu ta wordo haci den e diverso espacionan di e empresa pa por garantisa un bon servicio na
e comunidad. SETAR, cu un bestand di 425 empleado, ta traha duro pa sigui optimalisa su servicio y ta
crea departamentonan extra cu bon experticio pa por cumpli cu esaki. Na final di e recorido tabatin un
lunch liviano unda Minister Arends hunto cu director Croes a resumi den un ambiente agradabel e
recorido di e mainta. Minister Arends a keda cu un bon impresion di loke el a mira.
Minister Arends: "Mi a keda sumamente impresiona pa tur loke mi a mira den e departamentonan unda
mi a pasa. Tanto aki como den Hendrikstraat unda tin e centro di data. Mi tin palabranan di elogio pa
director di SETAR, pa e inversionnan cu a wordo haci."Minister tabatin palabranan di elogio tambe pa
Hunta di Comisario pa inversionnan haci den tecnologia, den innovacion y den hende. Loke el a ripara ta
cu tur empleado di SETAR ta compromete na e compania y nan trabou. El a constata cu nan ta orguyoso
di nan empresa. SETAR ta e unico compania estatal cu literalmente mester competi cu sector priva. "Mi
ta convenci cu SETAR tin e personanan adecua, hobennan cu mentenan jong , cu por yuda den
innovacion pa semper ta un paso dilanti di e siguiente desaroyo. Nos tur sa cu desaroyo den
comunicacion ta hopi dinamico y a base diario cambionan grandi ta tuma luga. E cliente a bira hopi mas
exigente y tin tambe mas escogencia. Mi ta sigur cu SETAR tin tur cos bon ekilibra pa ta e compania
nacional di Telecomunicacion di Aruba y cu tin e potencial pa por brinda servicio den exterior."