Page 7 - WEB MARCH 2,2016

Diaranson tin sentencia di ex director
WEB Oslin Boekhoudt

Posted on 03/1/2016 11:38 pm AST | Updated on 03/2/2016 6:54 am AST

ORANJESTAD – Diaranson mainta corte tin cu dicta sentencia den e caso cu ex
director di WEB NV Oslin Boekhoudt (conoci como OJ) a entama contra su
hefenan, den e caso aki Utilities y gobierno di Aruba. For di informacion cu
NoticiaCla.com tin, e posibilidad ta cu huez por pospone e caso, of dicta un
sentencia cu por tin varios forma. Entre nan, cu por pone nan sinta hunto pa yega
na un areglo cu ambos partido por biba cu ne, y determina un periodo pa esaki
tuma lugar. Sino e mes por dicta un sentencia. Of e por dicta un sentencia mesora.

KICO A SOSODE

Manera ta conoci, mitar di aña pasa, Boekhoudt a wordo manda cas, pa motibo cu e no
tabata funciona mas y tabatin ‘falta di comunicacion’ entre su persona y su superiornan.
Segun contract, e tabatin 6 luna di pago cu e por a haya, cual a vence na december
ultimo. Na december Boekhoudt a dicidi di entama e caso cu a tuma lugar e aña aki
pasobra e no ta di acuerdo cu e retiro. Y ta spera un sentencia diaranson.

KICO POR PASA

NoticiaCla.com a compronde cu e posibilidadnan por ta cu e lo por haya un suma
cuantioso di placa, aunke cu esaki no ta mes hopi cu hende ta kere. Lo tin cu warda kico
ta pasa cu e sentencia y si partidonan lo acepta esaki. Mientrastanto tin un director cu a
keda apunta recientemente, den persona di Luis Oduber. Oduber for di momento di retiro
di Boekhoudt, a tuma e rienda di e compania, pendiente kico lo a wordo dicidi pa su
superiornan riba maneho di e compania. E mes finalmente a keda apunta pa e funcion
maximo.

http://www.noticiacla.com/news/5192