Page 16 - MIN VOS

SV La Fama cu siman pasa a realisa e groundbreaking pa nan mini veld di futbol cu
yerba artificial.

Giovanny Croes, Tesorero y Team Manager di SV La Fama a expresa su satisfaccion y di

henter e organizacion ora el a bisa cu pa nan ta un alegria y orguyo grandi. “Vision di
gobierno ta cuadra cu e vision di La Fama y sigur lo trece un cambio y progreso den e
mentalidad di deporte, pero tambe den e dushi bida den bario di Savaneta y bicindario.
Nos ta kere cu un proyecto asina lo engrandece y mehora bida di nos tur akinan.”

Minister President Eman di su banda a duna di conoce cu, como Gobierno, nan ta hopi
contento cu por duna e aporte aki na SV La Fama, un organizacion cu a demostra di ta
dedica na duna oportunidad y un desaroyo positivo na nos hobennan. Eman a gradici

directiva y miembronan pa nan cooperacion ya cu ta den union di forsa ta logra e
resultadonan aki.

Adicional na esun di La Fama cu lo keda cla pa fin di augustus, tin cinco otro cancha

den progreso den diferente bario. E siman anterior a inicia esun na Angochi y tambe tin
un destina pa Centro di Bario Dakota, entre otro. E proyecto aki ta uno cu Gabinete
Mike Eman tin algun tempo caba trahando riba dje, bou direccion di Ditto Acosta, pa
logra financiamento atrabes di Comite Olimpico Arubano y tambe International Olympic

Committe.

A scoge deliberadamente pa realisa e construccion durante dianan di vakantie pa asina
ora cu school cuminsa back, y entrenamento hunto cune, e facilidad ta cla tambe pa tur

e muchanan usa. “Nos ta hibando batting cages y soccer turfs den diferente bario y e
siguiente stap lo ta pa tur veld bira di yerba,” Eman a bisa. “Esaki ta un practica den
escala chikito.” Na final di e ceremonia na Savaneta, Croes a pidi Dios pa duna Minister
President hopi bida y salud pa sigui traha pa pueblo y apoya deporte manera el a bin ta

haci.

Sea ta cu un mini veld di futbol na Arseñal, sosteniendo deporte di kite y windsurfing of
rehabilitando pista di Rough Riders na Savaneta, no tin duda cu Gabinete Mike Eman

atrabes di e programa BoBario, tin e futuro di nos deportistanan y di deporte en general
na pecho.