Page 12 - ttc jan 19,2016

Ampliacion di cambernan di Divi ta cay den e ratio di 40%
di cambernan all inclusive

Publication: Tuesday, 19 January 2016. Categoria: General
Minister Otmar Oduber

ORANJESTAD (AAN) – Den un declaracion duna door di Minister di Turismo, Otmar Oduber,
na occasion di e ceremonia di ampliacion di cambernan di Divi Hotel, el a splica cu e expansion
aki ta cay den e 40% stipula pa loke ta cantidad di cambernan all inclusive.
E mandatario ta contento cu e trabao cu Divi Hotel ta haciendo y a bisa cu mirando e discusion
cu tin awor, Divi semper tabata parti di e portofolio pa loke ta all inclusive na Aruba.
E discusion cu tin actualmente ta puntra cual banda Gobierno ta scoge y semper a bisa cu ta
busca un mix cu ta adecuado pa pais Aruba, tabata e contesta di e mandatario riba kico e
ampliacion di e cambernan all inclusive di Divi Hotel ta nifica pa Aruba.

“Aruba ta chikito pero nos tin bentaha di ta chikito tambe pasobra nos por scoge e rumbo den
cual nos kier bay y nos ta scoge pa calidad. …. Mi ta kere cu Divi, definitivamente y sin duda, ta
forma parti di e portofolio all inclusive pero di un categoria y calidad masha halto mes. Awe tur
hende ta testigo di e inversion cu ta worde haci, un ampliacion di mas o menos 60 camber, cu ta
keda denter di e margen cu nos a pone di mas o menos 40% cu ta e top di loke kier logra den e
mix di e tipo di cambernan na Aruba.”
E mandatario a bisa tambe cu ta un honor grandi pa su persona pa mira un di e partnernan di
Aruba a haci un tremendo trabao den sector all inclusive, pero tambe nan time-share, hotelnan,
golfcourse, y kendenan semper tabata un partner hopi valioso di Gobierno y pais Aruba.
Minister Oduber tambe a papia di e maneho cu tin poni door di Gobierno di Gabinete Mike
Eman II y cual ta siguiendo. Ta reuni cu tur hotel riba e tema aki. Ta papia di e cantidad di
cambernan cu kier ta cay bou all inclusive. Aruba a fiha esaki na 40%.