Page 5 - MODUL BASA JAWA VIII - TEKS CERKAK

Gatekna wacan cerkak ngisor iki!!!

Aku Profesor Temen

Aku ilo kait cilik gak tau mbayangna dadi profesor. Kok ngantek profesor, wong isok
melok sekolah SD ae gak tau ngipi, kok?! Embuh! Mara-mara aku melok Cacakku sekolah.
maune aku mek longguh-longguh thok nang ngarep kelase cacakku karo nyesepi es ganepo
sampek entek legine. Angger cacakku istirahat mesthi aku dijak mlebu kelase, diwulangi
pelajarane. Esku dijaluk cacakku, masiya wis gak legi blas ya gelem, jarene lothung timbang
ketelake nemen. Gurune ruh ya meneng ae. Let setaun aku dikeki gurune cacakku klambi potih,
dikongkon sekolah kelas siji. Mbok! Suwenengku gak ilok! Sida turut gang, nasak pasar, sampek
pencolotan sak orute ril selak wedi sepure liwat.

Ya mek iku thok klambiku sing otuh, ya lungsurane anake Bu Guru iku thok. Liyane iku
klambiku gak onok sing utuh, rowak-rawek kesuwek sarane urip. Ojok maneh kok tuku klambi,
wong sing dipangan sakben dinane ae bapak ibukku kudu budhal buruh dodol tenaga sedina
muput, kok? Ngono ilo ibukku jik kober nggoleki aku karo cacakku nang sekolahan nik aku telat
mulih, karo nggendhong adhikku bayek nang tangan kiwa, sing tengen nggawa payung, sampek
sakketemune. Lagek mandheg nek wis mbuktekna aku karo cacakku slamet karo gak kudanan,
gak blakrakan katut wong-wong bingung kenek hawa panase kutha gedhe.

Koyok dina iki, biyasane ya ngene iki, aku budhal nyambut numpak bis Surabaya-
Malang. Aku milih bis sing gak AC-an, mergane balungku krasa pating crekot nek kenek AC.
Numpak bis kalem-kalem longguh rodok mburi karo nglamun-nglamun ngeling-eling kabecikane
wong tuwaku ngopeni anak telu isok sekolah kabeh cik gak diplindhes wong mbesuke. Ya kabul
kajate. Saiki cacakku dadi pejabat nang perusahaan sepur duweke negara (saking tuwuke
pencolotan torut ril biyen), la adhikku dadi pengusaha sukses nang biro perjalanan Jakarta. Ya
mek aku thok sing dadi guru negeri, sampek oleh idine Gusti Allah isok mangku jabatan
fungsional minangka Guru Besar. Mahasiswa nik nyapa aku: “Prof!” lo, yok apa? Lak ya
ngguantheng se?

Ya iku sing nggrahi aku gak kendhat sojud sokur nang Gusti Allah sing wis maringi aku
kabegjan gedhe, luwih gedhe timbang sing takkarepna, luwih akeh timbang sing takjaluk. Tas
takkekep, isine ya laptop cilik, daftar nilaine mahasiswaku, buku kerja, suri cilik, saputangan,
dhompet, kacamata, karo obat ngelu. Taksawang apa ae sing ketok nang mripatku, wit-witan
pinggir dalan, wong munggah-mudhun bis, wong dodol, wong ngamen, wong ngemis, kabeh