Page 4 - Bab Tembang Macapat

Tugas 2 : Nyemak Watak Tembang Dhandhanggula
Tembang macapat jinise ana 11. Saliyane nduweni paugeran kang pinathok saben jinis tembang
macapat uga nduweni watak dhewe-dhewe. Kanggo luwih cethane ngenani watak tembang
macapat bisa dideleng ing tabel ngisor iki:

Mligi watak tembang Dhangdhanggula, watake luwes lan manis. Watak luwes tegese watak kang
kinandhut ing tembang Dhandhanggula kanggo medhar rasa pangrasa, bisa isi pitutur, piwulang,
tresna asih, asah, lan asuh. Watak manis tegese pamedhare pitutur, piwulang, tresna asih kanthi
tetembungan sing manis, endah, lan kebak pasemon ing pangajab nuwuhake rasa pangrasa luwih
nges.

Tugas 3 : Nintingi Isi Tembang Macapat Dhandhanggula
Tembang Macapat iku mujudake karya sastra kang lumrahe ditulis kanthi basa rinengga. Mula saka iku,
kanggo mangerteni isine tembang mau kudu digancarake luwih dhisik. Sing diarani gancaran yaiku
prosa (karangan bebas). Dadi nggancarake tembang ateges ngowahi tembang dadi prosa. Carane
nggancarake tembang kaya mangkene:

1) Negesi saben tembung kanthi nggoleki ing bausastra (Kamus Basa Jawa)
2) Ngrakit tembung-tembung mau dadi ukara kanthi paugeran panulise karangan
gancaran/prosa, kanthi cara bisa nambahi tembung katrangan, tembung
panggandheng.
3) Panulisane kudu ngugemi tata tulis lan tandha wacan sing bener