Page 17 - M-Prog_Pie_051019v1_Neat

Matchprogramm FC Büren an der Aare Samstag 05.10.2019 /Ausgabe 4-19

INSERAT U SCHÜSCH SO ZÜGS

Platzkassier

Üses Inserat Platzkassier hei mir mit grosser Luscht glöscht! Grund derzue het üs d"Meli"
Melanie Lerch glieferet. Sie het am FCB zuegseit, dä Poschte für die Saison z'übernäh. E
idrücklechi Art, wie me das cha mache het d'Melanie am Heimschpiu gäge SC Rüti abglieferet.
Es söttigs Hüfali isch scho lang nümme zämecho. Mir si froh und säge ganz härzlech merci!

Büvette
Es Thema wo viu beschäftigt, wo's de öppe ou mou roti Chöpf git. Das Thema isch natürlech
ou prägt vo dr Situazion, dass denn d'Isätz si, wenn gschuttet wird. Fouglech chöi die wo
schutte, nid no glychzytig hingerem Trese schtoh, das isch gloub so wyt no verständlech. Auso,
de bruchts haut Auternative u die Auternative müesse mir aui gmeinsam gfinge, villech haut
ou im Umkreis vo Verwandt- und Bekanntschafte mou pär exgüsee froge?

D'Kunscht vom Büvette mache isch, öpper z'gfinge wo für eim schaffet!
Nei dumme Seich. D'Kunscht isch mit diverse Lüt e Gruppe biude und sech fang einisch
ischriebe. Je grösser das Gruppe isch, umso weniger muess dr Einzeln i Isatz. U si mir ehrlich,
zwe Tag im Johr mit Lüt wo me uschunnt gmeinsam öppis ungernäh macht Schpass und
schränkt die pärsönlechi Freiheit nid schpürbar y. Wär wenn und warum was, das chunnt de
vo säuber. Het me d'Büvette es paar mou gmacht, überchunnt me Luscht u macht die erschte
Menü. Und weme so innovativ isch, dass die Bude louft, chame nächhär mit de Prozänt wos
git guet go ässe, es Reisli mache oder schüsch öppis verruckts aschteue. Tönt doch guet –
animiert üs doch? Es wär e Fröid, wenn dä Ufruef Frücht würd trage.

Ig wett mit däm Ufruef ou aui die Lüt hingerem Ofebänkli fürelööke, wo johrelang aktiv si gsi u
hüt dr Lache nume no vom ghöre säge kenne. Mir fröie üs uf di, do chasch sicher si!

17