Page 8 - allbrochureV1304

Nieft der Haaptformatioun gouf déi méi kleng a flexibel
Formatioun d’Musikussen gegrënnt. Mir wëllen awer och déi
Leidelenger Crescendi ervirhiewen, de Kanner-a
Jugendensembel vun der Musek, déi viru ronn dräi Joer
gegrënnt gi sinn an déi e wichtege Schrëtt an der Ausbildung
vum Nowuess vun engem Museksveräin duerstellt. Et ass
wichteg, d’Kanner an déi Jonk scho ganz fréi
zesummenzebréngen an d’Freed un der Musek ze entwéckelen.
Dat, wat all déi Leit, déi sech an der Leidelenger Musek
engagéieren, verbënnt, ass d’Freed un der Musek. Eréischt
wann et Freed mécht, kann ee seng Begeeschterung un de
Publikum weidervermëttelen.

Wéi schéin ass et dach ze gesinn, wann an enger Musek d’Leit
zesummekommen. Jonker a manner Jonker, déi hiert Bescht
ginn, fir aus deenen doudege Punkten a Strécher um Nouteblat
eppes Lieweges ze schafen an domat och Gefiller ze
vermëttelen.

D’Leidelenger Musek feiert dësen 125. Gebuertsdag mat
engem villsäitegen a faarwege Programm. Sou huet se sech
zum Beispill vum talentéierte jonke Komponist Ivan Boumans
eng Kompositioun op d’Mooss schreiwe gelooss, ee ganz
perséinlecht Wierk mam Titel The Spirit of “A JACQUEN”.
Dat ass den Hausnumm vum deemolege Café Nicolas Biver,
wou 1893 d’Leidelenger Musek als Fanfare gegrënnt gouf. Den
Ivan Boumans huet sech un der Geschicht vun der Leidelenger
Musek inspiréiert an huet déi wichteg Etappe musikalesch
beschriwwen. Dës Iddi huet eis esou begeeschtert, datt mir
direkt bereet waren, dës Kompositioun ze finanzéieren. Et ass
ze begréissen, wann esou e Veräin ewéi d’Leidelenger Musek
zu der Lëtzebuerger Kreatioun bäidréit. Esou ginn nei Wierker
mat engem bleiwende Wäert geschaf.