Page 10 - Tamainupō E

Nāku te tāne! Nāku kē te tāne!
I whāia e Tamainupō rāua ko tana pononga te ara i whakaaturia. I hipa i Te Awaroa ka tae ki tētehi wāhi o runga ake o Pokokohua. I konā, i puta te hau, i kitea rā ngā tohu i poropititia e te tohunga. I mōhio a Tamainupō ki reira whakamutua atu tana oma, ka noho rāua ko tana pononga ki reira.
I tētehi rā, i haere te tokorua ki te tāhere manu ka puta mai i te taupae o Pokokohua ki te kōawa o Kāniwhaniwha pātata ki te pā tūwatawata o te hoariri o tōna matua, o Māhanga. I a rāua e tāhere manu ana, i te hīkoi ngā tamāhine a Māhanga, a Waitawake rāua ko Tūkotuku i te ngahere. I rongo a Tūkotuku i ngā manu e takataka ana ki te papa ka kī tana tuakana, “E tata ana tētehi tangata.” Ka ui atu a Waitawake i pēwhea ia e mōhio ai. Ka rongo rāua i tētehi anō pakō ka whakahoki ia, “Rē nā! E tāhere manu ana.” Ka whātaretare atu ngā tamāhine i ngā rākau me te kite i te pononga a Tamainupō e kohi ana i ngā manu. Ka hinga anō ētehi manu, ka kite ngā tamāhine i a Tamainupō ki runga ake o ngā peka rākau. Ka heke iho ia ka mihi ki a rāua. I manarū te tokorua rā i te ranginamu o Tamainupō me tana tautōhito ki te tāhere manu. “Haere mai koe ki tō māua kāinga,” tā rāua tohutohu. Ka mea atu a Tamainupō kia hoatu rāua, hei ā muri tata nei whai atu rā ia. I muri i te wehenga o ngā tamāhine, i hoki a Tamainupō rāua ko tana pononga ki tō rāua puni, ka whakatika ki te kōtutu i ngā manu. I whakarite hoki a Tamainupō i a ia anō ka miria tētehi hinu kakara kia pīataata mai tana tinana. I a Waitawake rāua ko Tūkotuku e hoki ana ki te kāinga i ngangare rāua mō Tamainupō. “Nāku te tāne!” Ko tā Tūkotuku. “Kāo, ko au te mātāmua, nāku kē!” hei tā Waitawake. Ka pērā tonu te ngangare tae rawa atu ki te kāinga. “E pā,” te karanga a Tūkotuku “Kua kitea e au tētehi tāne māku!” Ka rere atu a Waitawake, me te tohe “Nāku kē ia!” Kāore a Māhanga mō te whakaū i aua tohe, ka tatari kia tūtaki atu ki tēnei tangata kua whakawai nei i āna tamāhine.
Kāore i roa, ka whakatata atu a Tamainupō me tana pononga ki te pā o Māhanga. I kuhu atu te pononga mā te waharoa, engari i kake ake a Tamainupō ki runga i te waharoa, i mua i tana kuhunga atu. I tā Māhanga me tana iwi kite atu i tēnei, i mōhio rātou, ehara ia i te tangata noa. Ka mutu ana ngā mahi whakatau i a Tamainupō, i te whakararu tonu ngā tamāhine i tō rāua matua mō te moe i te tautangata nei. I kite a Māhanga i hiahia a Tamainupō i te teina nō reira ka huri ia ki a Waitaweke me te kī, “Kāti! Kua tau – mā Tūkotuku ia.”
Ao ake i te ata, i tono a Tamainupō kia tukuna ētehi kaiāwhina ki te tiki i ngā manu i kōtutungia e ia. He rau ringa i hiahiatia hei kawe i ngā tini manu. Ko ngā manu rā kua pukuwai ki te hinu, ā, he tohu o te pai o ngā mahi kōtutu me ngā karakia taka kai a Tamainupō. I mīharo a Māhanga, ā, kāore i roa i horahia te takapau wharanui e Māhanga kia moe a Tamainupō rāua ko Tūkotuku.