Page 8 - Tamainupō E

Ka puta te hau, ka papā te whatitiri, ka hikohiko te uira, ā, ka ua te ua...
I tēnei wā, kua rongo kē te iwi mō ngā mahi pūremu a Tamainupō, ka whāki atu ki a Taiko, i kitea a Tamainupō ki ngā māra kai. I reira tonu a Tamainupō e hauhake kūmara ana, ā, ka kōkiri atu a Taiko ki te patu i a ia. Nā te kakama o Tamainupō i tere karo i tana teina ka parea tana patu ki tana kō. I whawhai tonu a Taiko, engari i karo tonu a Tamainupō i ana āki. Ka pakanga tonu te tokorua nei, tae noa atu ki te hokinga o tō rāua Whaea. Kia kore tētehi e hinga i whakahau ia kia wehe a Tamainupō. I whakaae hoki a Tamainupō ka ngau kino ā-roto ki te noho tonu atu ia, ka wehe atu.
I whāia a Tamainupō e Taiko me tana tira ki Aotea. Tae rawa atu ki Te Māri, ka kite a Tamainupō i tana karanga matua e tārai waka ana. I te kitenga atu o te koroua nei i a Tamainupō i mōhio ia i te pōraruraru a Tamainupō, ka hunaia a Tamainupō ki roto tonu i te waka e takoto tāpapa ana. Nā runga i te tapu o te waka kāore anō kia oti te tārai, i mōhio rā anō te koroua ka kore rawa tētehi e raweke i te waka.
I te taenga atu a Taiko mā i ui atu rātou ki te koroua mō Tamainupō. I tinihanga te koroua me te rūpahu atu, kāore rā a Tamainupō i kitea, engari i tohe tonu a Taiko me te mōhio ko te ara i takahia e Tamainupō, he ara tautika atu ki reira. Ka noho ngū te koroua me te hoki ki āna mahi tārai waka, nāwai, nāwai, ka hoki te tira ki te kāinga. Nō muri mai, ka puta a Tamainupō i te waka.
Ka kī te koroua ki a ia, “Haere ki te Tohunga kei Taharoa, kei te tonga o Kāwhia. Māna koe hei awhina.” Mōhio pai a Tamainupō kāore e taea e ia te hoki ki te kāinga nō reira i whāia e ia aua tohutohu, a, ka tūtaki atu ki te tohunga. Nō muri mai i ngā mahi whakarite a te tohunga i a Tamainupō, ka tohu atu ki te taupae o Pirongia ki Ōpārarau, me tāna, “Koirā tō ara.” “Ka pēwhea au e mōhio hei āwhea tū ai?” te pātai a Tamainupō. Ka whakahoki atu te koroua “Tirohia ngā tohu...ka puta te hau, ka papā te whatitiri, ka hikohiko te uira, ka ua te ua. Tēnā, hoatu, kia tūpato!”