Page 13 - E-Modul Pendidikan Bahasa Bali SD

3.2 Theori Pemikirn Ahli
Bebaosan sakadi ring ajeng sampun nyantenang pawiwit basa
sajeroning i manusa sahasa embas kirang langkung kalih yuta warsa sane
lintang. Yadiastun sapunika, pamolihan basa sane sujati ring manusa, sampun
prasida kakawitin sadaweg kantun mayusa 18 bulan (kirang langkung mayusa
tigang oton) saking basa sane sadarana saha ngraris ngamolihang basa sane
sayan paripurna ri kala mayusa petang warsa. Sajeroning ngukuhang dasar
pikayunan punika, Brooks taler ngambil punggelan panampen saking Eric
Lennberg sakadi puniki. “Bahasa itu tidak ada hubunganya dengan kebutuhan
anak. Jika seorang anak itu mencapai umur tertentu dia tentu akan berbahasa,
sebagaimana juga dia akan berjalan, tanpa diajar. Bahasa akan lahir pada anak
menurut proses pematangan (maturation) yang mempunyai tahap-tahap yang
khusus untuk bahasa dan proses semacam itu sama bagi anak-anak di seluruh
dunia” Panampen sakadi punika taler kacumpuin antuk George Miller miwah
Noam Chomsky. Manut sujana widya basa punika makakalih, basa sane abot
saha nglimbak prasida pacang kapolihang antuk alit-alite sangkaning sampun
marupa bebaktan i manusa sane katamiang saking parikrama evolusi manusa
saking rihin. Indike puniki sane ngawinang manusa prasida ngamolihang
parindikan sane saksat mabinayan kalawan sarwa maurip tiosan ring
mercapada. Chomsky taler sampun nyobiahang panarka saking R. Descartes
saking abad ke-17 sane kasengguh hipotesis bawaan (in-inateness
hypothesis). Sajeroning tetarka punika kabaosang yening manusa saking wawu
embas sampun kajangkepin antuk kaweruhan sane marupa sakadi
“bebaktaan”. Kaweruhan puniki sane ngawinang i manusa prasida ngwangun
miwah ngamolihang basa. Prasida taler kapitegesang yening i manusa sampun
kapikardi pinaka “mahluk berbicara”. Ring dija ja i manusa magenah pastika
pacang ngwangun sarana anggen masilur-silur piuning. Sane ngawinang
asapunika santukan manusa sampun kapikardi saha kajangkepin antuk
sakancan parindikan (untek, indria ucap, karna, miwah sane lianan) pinaka
piranti ngwangun basa. Manut Chomsky miwah para sujana sane satinut, anak
alit punika kabaos madue gegambelan sane kasengguh “piranti pamolihan
basa” utawi ring basa Inggris ketah kabaos LAD (Language Acquisition Device).

10