Page 21 - MIN TTC NOV 23,2015

Doñonan di Galeria Espacio Azul ta kere y comparti vision
di Minister Oduber

Publication: Monday, 23 November 2015. Categoria: General

Pa haci di San Nicolas e centro historico cultural di nos isla

ORANJESTAD (AAN): Diadomingo mainta Minister Otmar Oduber a reuni cu
propietarionan di e galeria di arte Espacio Azul, Ana Maria Lombardi y Juan Carlos Marcano
Luque.

Ta trata aki di un galeria di arte cu a habri su portanan recientemente na San Nicolas.

Mester bisa cu e reunion a resulta uno masha interesante unda a resalta cu e propietarionan di e
galeria ta kere y comparti e vision y ideanan di Minister Oduber y Gabinete Mike Eman II pa
San Nicolas.

E vision cu ya caba ta den ehecucion pa haci di San Nicolas e centro historico cultural di nos isla
a capta e atencion di e propietarionan. Nan a indica cu nan a haci un estudio prome cu a habri e
galeria y a wordo guia door di ARINA den esaki.

Nan ta haya cu Aruba ta un destino turistico reconoci y cu na San Nicolas por habri portanan
diferente di loke conoce na e parti noord di nos isla. “Nos ta kere cu San Nicolas tin e
caracteristicanan cu a ser mira den otro partinan di mundo cu a desaroya como distritonan di arte
y diseño”, Ana Maria Lombardi a indica y a agrega cu pa nan tabata un sorpresa hopi agradabel
di por a mira cu Minister Oduber y Gobierno di Aruba tin den nan maneho e desaroyo di San
Nicolas como centro cultural di Aruba.

Minister Oduber a comparti e diferente ideanan, plannan y proyectonan cual algun di nan ya caba
ta den ehecucion pa San Nicolas manera ta entre otro e diferente museonan, mudamento di
Departamento di Cultura pa pariba, apertura di un workshop pa e diferente artistanan y
artesanonan na nos isla, apertura di un tienda manera Cosecha cu ta ofrece unicamente
productonan traha na Aruba y cu SEYO di artesania, revitalizacion di Promenade cu pa
casualidad e destaho publico a tuma lugar diabierna cu a pasa y varios otro proyecto tanto
publico como priva.