Page 8 - KPA

Polisnan Envolvi Den Morto Di Mitch Henriquez:

Nunca Nos A Mira Un Homber Asina Fuerte

 Local

 Policial
- 13/11/2017

Dialuna mainta a cuminsa e huicio contra e dos agentenan policial cu ta wordo acusa di ta
responsabel pa morto di e Arubiano Mitch Henriquez. Segun publicacion di corantnan
Hulandes, durante tratamento di e caso a bini dilanti cu e Polisnan a bisa cu Henriquez
tabata grita cu e tin un arma caliber 52, e lo a haci un señal di gangster y a mishi cu su
curpa di abou diferente biaha. Tambe lo tintestigonan cu a bisa esaki.

Den e informacion cu a bini dilanti ta wordo bisa cu e Polisnan a hala atencion di e
victima y a dun’e ordo pa bay for di e sitio. Inicialmente el a cana bay cu un muhe. Pero
el a ranca los y a cana bay direccion di e Polisnan pa grita nan un biaha mas cu e tin un
arma. E prome biahanan, nan ta bisa, el a hari. “E tabata mustra asina menasante cu mi di
berdad mi a pensa cu e tabatin un arma di candela,” un di e Polisnan a declara dialuna
den Corte, e corant Hulandesnan a publica.

Un di e Polisnan a bisa cu nunca antes el a hay’e confronta cu un homber asina fuerte.
Nan tabata cinco Polis y nan tabatin problema pa control’e, un di e agentenan a bisa den
forma anonimo durante e caso contra dje y su colega den un sala cu extra siguridad na
Schiphol.

E informe ta sigui bisa cu ora cu Polis kier a aresta e homber Arubiano, el a nenga di
cooperacion. E cinco polisnan a dal Henriquez, e dun’e un tik y a primi pepperspray den
su wowonan pa despues dal’e den klem.

Na momento cu Henriquez tabatin e boeinan poni na su mannan, su resistencia a kibra.
Casi e no tabata reacciona, y tampoco ora cu nan tabata prik ‘e. Apesar di esey, e
Polisnan no a scoge pa yama un ambulance pero a hinke den e Van di Aresto. Segun e
polis a bisa, esaki tabata pasobra e situacion ey bou no tabata sigur, “nos mester a bay for
di e sitio.”