Page 31 - ATA MAY 4,2015

Prome Minister Eman: Ta un honor y orguyo grandi pa tin nos
Pareha Real cu ta simbolisa e forsa di Reino un bes mas na
Aruba

Thursday, 30 April 2015 17:03

Den oranan di diahuebs atardi Gobernador di Aruba sr. Fredis Refunjol hunto cu Prome Minister Mike
Eman y secretaria di Conseho di Minister Nicole Hoevertsz a haya un recorido den e residencia oficial
renoba di Gobernador.
E recorido a wordo haci pa Daphne Every y Yvonne Webb di Monumenten Bureau, e bureau cu ta
encarga cu e trabou di restauracion. Un trabou bunita acaba y supervisa pa Jose Fernandez Pedra. E
residencia cu ta den su fase final di renobacion a wordo financia pa Gabinete di Gobernador, gobierno
Hulandes y di Aruba. E hardin a keda masha bunita mescos cu e cura espacioso na unda tin un fontein ta
basha awa pa crea un ambiente fresco. Mañan mainta Pareha Real, cu ta bishitando Aruba riba Dia di
Obrero, ta wordo ricibi den oranan di mainta den e residencia pa Gobernador Refunjol.
Dia 1 di mei Aruba un bes mas ta cla pa ricibi Rey Willem-Alexander y Reina Maxima. “Un honor y un
orguyo grandi”, Prome Minister Eman a bisa di e bishita Real aki. Un bishita cu tin su refleho den mundo
henter, ya cu e ta den cuadro di e di 200 aña di existencia di Reino Hulandes. E bishita ta wordo combina
cu un demostracion cu botonan di bela den e evento Sail cu ta bay bira algo unico. “Mañan Gobernador ta
ricibi e Pareha Real aki den e cas cu tabata antes cas di Gezaghebber y despues di Gobernador.” Eman ta
masha satisfecho con e trabou di restauracion di e residencia di Gobernador y hopi otro monumentonan
na Aruba ta bayendo. “E cas aki ta bay haya un otro funcion cu di loke e tabatin. Tanto Gobernador como
Conseho di Minister ta bay haci uzo di e edificio pa momentonan hopi ceremonial y ora di bishitanan di
importancia. Mañan Gobernador ta ricibi Pareha Real den e edificio monumental y historico aki y ami lo
ricibi nan na momento cu nan ta subi e botonan iniciando asina e celebracion di nan bishita den e evento
Sail.
Prome Minister Eman ta hopi orguyoso cu cada bes cu un of mas miembro di Cas Real bin Aruba nan ta
mira asina hopi cambio y progreso. “Na momento cu e Rey baha di avion y mira e Solar Park cu ta un di e
mas grandinan den Caribe, e ta mira con nos ta realisando nos soño. Un soño cu e mes a contribui na dje
cu un discurso masha elocuente na e Green Conference na unda el a bisa cu Aruba ta canando e bon
pasonan y awor e mes por ta testigo cu enberdad nos ta canando e bon pasonan.” Eman a bisa cu e
Pareha Real ta simbolisa tambe e forsa di Reino, caminda cu tin e parti di Europa y esun Latino-
Americano. “Esaki ta keda identifica y simbolisa den e dos personanan aki cu ta carga nos Reino como
cabes di estado”.