Page 53 - ATA MAY 4,2015

na Aruba

Friday, 01 May 2015 20:15

Na luna d9i februari a keda anuncia cu Aruba a gana e premio di National
Geographic World Legacy Award den categoria Destination Leadership.
E hurado cu tabata consisti di 18 profesional y presidi door di Costas Christ, tabata masha entusiasma cu
e ambicion di Aruba pa na 2020 ta e prome pais na mundo cu ta bay haci uzo completo di energia
renobabel. E hurado tabatin tambe gran aprecio pa e forma energetico con e isla ta trahando duro pa
logra e meta ambicioso aki y bira asina un pais modelo pa mundo. E premio prestigioso aki a wordo
entrega na Minister Sevinger luna pasa na Berlin. Un team di ATA tambe tabata presente na e ocasion
aki. Den su edicion di e luna di mei National Geographic Traveler ta dedica atencion special na Aruba.
Bou di e titulo ‘Winner destination leadership: Aruba’ NG ta skirbi cu kizas ta parce poetico cu un di e
islanan mas chikito di mundo, situa banda di un di e nacionnan petrolero mas grandi di mundo, a
compromete su mes pa na 2020 bira e prome pais na mundo cu no ta depende di petroleo fosil. Aruba,
un isla Hulandes chikito cu ta biba di turismo ta haci cosnan grandi.
El a join Carbon War Room cu a wordo funda na 2009 pa lidernan internacional renombra manera Sir
Richard Branson pa bringa cambio di clima, mescos tambe Aruba tin un di e parkenan solar mas grandi
den Caribe. Cu14.400 panelnan solar, un cantidad cu pronto ta bay wordo duplica, ya caba un porcentahe
di 20% di su energia ta bin di biento y un planta cu ta converti sushi den coriente. Esaki ta transforma e
isla den uno di energia renobabel. Otro plannan cu e isla tin riba e tereno aki ta pa introduci autonan
electrico cu un lugar unda por carga nan y e prome trolley cu ta haci uzo di un sistema di bateria cu ta usa
celulanan hydrogenico cu ta wordo carga pa e energia di solo y biento. Cu e isla ta rondona pa
kilometronan di santo blanco y awanan blou, ta un extra bentaha, un bonus, National Geographic ta
ilustra. “Nos ta un laboratorio bibo pa un sociedad sostenibel”, Prome Minister Eman, kende a inicia y a
para na cabez di mayoria di e iniciativanan, a bisa. Aruba ta e ehempel pa otronan. Seis otro nacion
Caribense a bisa di lo sigui e modelo di Aruba. Te asina leu e articulo den e revista prestigioso National
Geographic cu tin mas di 450 miyon di hende rond mundo ta lese y ta un di e organisacionnan non-profit
mas prestigioso cu tin riba tereno di ciencia, educacion y turismo.

http://www.24ora.com/local-mainmenu-5/94702-revista-national-geographictraveler-
ta-dedica-atencion-special-na-aruba