Page 12 - MIN JUS - ARTHUR DOWERS

Despues cu resultado di eleccion ta conoci diabierne awor, ya dialuna siguiente,
Gobernador lo invita lider di e partido cu a haya mas asiento, pa sondea kende lo bira e
proximo Informador, kende lo sondea con e proximo Gobierno lo ser forma.

Si ta un solo partido a haya mayoria, lo no tin problema, ya e ora ey e Informador, casi
sigur lo bira tambe Formador, kende lo reuni cu tur gremio pa tende nan inquitudnan cu e
Gobierno nobo lo mester bay tene cuenta cu nan.

Si ningun partido haya mayoria, nifica cu e lider di e partido cu mas asiento, lo ser invita
pa delibera cu Gobernador y lo haya e encargo pa bay sondea cua partido lo por forma
parti di un Gobierno nobo, esta un Gobierno di coalicion.

Mientras cu Parlamento den su constelacion nobo lo asumi asiento, pa fin di luna di
october y no necesariamente mester tin un Gobierno caba. Lo ta lo ideal. Mira p.e.
Hulanda, unda tabatin eleccion pa Tweede Kamer, y te awe no tin un Gobierno forma,
siendo eleccion a tuma lugar varios luna pasa.

Na Aruba, formacion di proximo Gobierno lo no dura tanto tempo. E pregunta sin
contesta awe ta, Aruba lo haya un Gobierno di coalicion y forma pa cua partidonan? Pero
algun observador a bisa caba, despues di wak e parada di diadomingo ultimo, AVP lo
saca mayoria su so y no mester di forma ningun coalicion.

Pueblo tin e ultimo palabra y lo haya e Gobierno cu e merece.