Page 32 - AAA April 29 2015

Albatros Airlines ta operando oficialmente na Aruba cu 3 vuelo diario di
Aruba pa Las Piedras

 Apr 29th, 2015
 Local

Durante un fiesta cocktail teni den e Non-US Plaza di Aeropuerto di Aruba dilanti di e oficina
nobo di Albatros Airlines, Aruba Airport Authority N.V. (AAA) oficialmente a yama bon bini na
Albatros Airlines. Albatros Airlines a wordo funda dia 27 di December 2007 y a ricibi nan
Airline Operating Certificate (AOC) for di e Institituto Nacional di Aviacion di Venezuela riba
13 di Mei 2010. E AOC ta autoriza e aerolinea pa brinda servicio aereo domestico y
internacional comercial pa pasahero, cargo y post for di Venezuela. E aerolinea tin varios
operacion di charter internacional incluyendo vuelo pa Aruba, Corsou, Barranquilla, Trinidad y
Haiti entre otro. Albatros Airlines a inicia nan operacion pa Aruba na December 2014. Nan tin 3
vuelo diario for di Aruba pa Las Piedras cu ta sali 9’or di mainta, 2’or y mey y 4’or y mey di
atardi. Nan flota cu ta wordo uza pa nan servicio pa Aruba ta consisti di un Cessna 208 (12
pasahero) y un Embraer cu capacidad pa transporta 30 pasahero. Sr. Carlos Montilla, CEO di
Albatros Airlines tabata contento pa anuncia cu e aerolinea tin plan grandi pa futuro. E plannan
aki ta inclui destinacionnan nobo cu lo wordo anuncia pronto. Recientemente e aerolinea a
cumpra 2 avion Boeing pa aumenta su flota pa asina mehora y expande nan “network” di
servicio aereo.
AAA su CEO Sr. James Fazio tabata contento di por yama bon bini na e aerolinea chikito den
nan oficina nobo situa na aeropuerto y a expresa cu e ta spera cu e “partnership” cu Albatros lo
yuda desaroya servicio adicional den e futuro cercano.