Page 60 - flip minvos

Awe mainta a sali pa Boneiro e delegacion di Deporte Escolar di Aruba. Como hefe di e delegacion a biaha Giovanni
Hoek di IBiSA, acompaña pa sr. Esmond Jones cu ta encarga di parti IBiSA cu e deporte di Futbol di Sala. Tambe a
biaha sra. Mildred Wever, encarga cu e deporte di Atletismo pa Aruba. Na aeropuerto e delegacion a wordo dispidi
pa sra. Monique van Embden, Director di IBiSA y sra. Jacqueline Ponson van Putten, Chef di Deporte Escolar.
Contento y yen di animo e hobennan cu ta forma parti di e ekipo di Futbol di Sala di Colegio Arubano y campeon
escolar di Aruba, acompaña pa meneer Sjoerd Henri Marie van de Vaart cu ta nan coach tabata cla pa aborda y
enfrenta e reto di fin di siman. Sigur esaki ta grandi pa e ekipo di Colegio Arubano cu a priminti di haci un bon trabou
di mantene e titulo di campeon den futbol di sala pa ‘Weganan Interinsular’ pa Aruba.
Di otro banda e chikitinnan cu ta forma parti di e seleccion di atletismo, cu ta 9 mucha muher y 9 mucha homber,
acompaña pa nan coachnan sr. Wiwi Piña y sra. Lisandra Maduro tambe tabata presente na aeropuerto for di
trempan. Tur e muchanan tabata yen di animo y emocion pa e biahe y sigur cla y bon entrena pa e competencia di
atletismo contra e muchanan di Corsou y Boneiro.
Algun mayor tambe ta biaha pa Boneiro pa bay apoya nan yiunan durante e competencia di e fin di siman aki. IBiSA
ta desea e delegacion di Aruba un bon biahe cu Insel Air y hopi exito den e encuentronan deportivo di fin di siman cu
por tin na final hopi medayanan y trofeo di campeon pa Aruba.
Pa un reportahe di potret por bay riba Facebook di IBiSA of riba website: www.ibisaruba.org .

http://masnoticia.com/delegacion-di-deporte-escolar-di-aruba-a-sali-pa-boneiro/