Page 5 - awem

AWEMainta Diahuebs, 22 Oktober 2015 5

Evelyn Wever-Croes:

“Nos mester
mehora calidad
di cuido”

Mester pone atencion n’e dokter
y e paciente

“DURANTE mi bishitanan den bario, un di e

preocupacionnan cu mi ta encontra den tur cas, ta
preocupacion pa cu cuido di salud.
Den cada cas nan tin un otro storia pa conta, con
decepciona nan ta den e cuido di salud aki na Aruba.
Esaki no ta husto, especialmente no pa nos grandinan.
Y mas tristo ta, cu nada ta wordo haci pa mehora e
cuido di salud”, asina líder di MEP, Evelyn Wever
Croes a duna di conoce.

“Nos a reuni un tempo pasa cu organisacion di dokter
di cas, di specialistanan, y di specialistanan den
servicio di hospital.

Durante e reunion aki a bin hopi punto padilanti cu ta
crucial si kier mehora e calidad di cuido. Dokternan
ta trahando bou di un presion enorme, debi na falta
di dokter.
Y esey ta conduci na varios otro problema, pasobra ta
imposibel cu un dokter cu a traha 7 dia sigi, por duna
e mesun atencion y cuido na su paciente.

Esey ta un punto crucial cu AZV y Gobierno mester
soluciona p’asina cuminsa mehora calidad di cuido.
E falta di dokter ta pone tambe cu pacientenan mester
warda hopi largo prome cu wordo atendí. Pesey nos
mester soluciona e problema di reconocimento di
diploma di nos yiunan di terea cu studia medicina
den nos region.
Nos mester di nan, pero nos Gobierno no kier laga
nan traha, y asina nos ta causa “brain-drain” pasobra
na otro pais si nan ta wordo ricibi cu brasanan habri”,
Evelyn Wever Croes a sigui comenta.

Calidad di cuido pa partido MEP tin un prioridad hopi
halto. No por t’asina cu un hende mester warda mas
di 6 luna pa mira su specialista.
Nos a spera cu e Minister di Salud, dr. Alex Schwengle,
mirando cu e mes ta un dokter di profesión, lo por
tuma e problemanan aki na serio y busca un solucion,
pero e tampoco a haci net net nada pa mehora e
calidad di cuido.

E ta mas cu dos aña caba Minister, pero no tin ningun
mehoracion, y esey nos ta lamenta”, líder di MEP
Evelyn Wever-Croes a duna di conoce.