Page 80 - MIN TTC SEPT 11, 2015

Comerciantenan a laga sa cu turistanan NO ta baha di e tram
Publication: Friday, 11 September 2015. Categoria: General
Fraccion di MEP:

ORANJESTAD (AAN): Diamars ultimo parlamentarionan di MEP a bishita e tiendanan den
caya pa por a tende e opinion di parti comerciantenan y trahadornan riba e progreso den Caya
Betico Croes desde cu a bin cu e tram y ultimo cu a introduci ley di parkeermeters.
Loke a capta atencion di nos fraccion y a worde confirma door di comerciantenan ta e hecho cu
bishitantenan no ta bahando for di tram pa haci nan compras. Esaki sigur ta un decepcion
mirando e hecho cu miyones di Florin a worde inverti den e proyecto di tramnan y awor nos ta
tende cu e proyecto di tram no a duna e efecto positivo na caya Betico Croes.
Es mas, hasta esnan cu ta traha den caya ta nota cu desde e tram a cuminsa core te hasta MENOS
hende ta bin den Caya Betico Croes.
Ademas di e hecho cu esnan cu ta usa e tram no ta baha pa haci compras tin e dilema cu tin
varios localidad bashi cu a cera pa motibo cu negoshi no ta draai. Nos di oposicion ta lamenta si
cu a bay over na gasta miyones di Florin siendo cu e resultado actual no ta esun di mas mihor pa
e comerciantenan. Algo sigur ta cu mester a traha mas riba haci caya atractivo y pa medio di
incentivonan stimula bishitantenan pa haci compras den caya pasobra loke ta pasando awor ta
duna un mensahe cla: en bes cu e tram a yuda, ta mas problema el’a ocasiona!
http://www.diario.aw/2015/09/comerciantenan-a-laga-sa-cu-turistanan-no-ta-baha-di-e-tram/