Page 7 - LOTTO APRIL 1,2016

LOTTO CU PALABRA DI FELICITACION NA TUR E
GANADONAN DEN E PRESTIGIOSO PREMIO
EXCELENCIA DEN DEPORTE 2015

Diaranson anochi Ministerio di Deporte cu e sosten y apoyo financiero di Lotto, e loteria di Aruba a honra
nos atletanan cu a destaca den e aña deportivo 2015. Pa 13 aña caba Premio Excelencia den Deporte ta
existi y semper a sirbi como un muestra di gratitud, reconocimento, y estimulo cu ta duna na esunnan cu
a destaca den mundo di deporte. Riba e bunita anochi aki atleta y nan famia, dirigentenan como tambe
invitadonan di honor a otorga e medaya y galardon maximo na e atletanan cu a sobresali pa nan
federacion como tambe pa e Comision di Hurado.

Lotto, e loteria di Aruba cu pa medio di Comision di Subsidio ta subsidia mayoria actividadnan di deporte
pa nos federacionnan deportivo y nan atletanan ta masha orguyoso di cada atleta nomina e anochi aki.
Cada federacion ta traha duro na bienestar di nan deporte y nan atletanan. Den e ultimo añanan e
deporte di Aruba a conoce un adelanto enorme unda e nivel hasta a bira uno competitivo logrando
resultadonan abrumador den nos region y continente. Es mas algun di nos atletanan a logra clasifica pa
e Weganan Olimpico di Rio de Janeiro 2016, un resultado historico mirando cu ta pa prome biaha esaki
ta sosode. Esaki sigur ta un di e metanan principal di tur stakeholder envolvi den deporte, incluyendo
Lotto, e loteria di Aruba.

Lotto, e loteria di Aruba kier a felicita tur atleta nomina den e Premio Excelencia den Deporte 2015. No
mester lubida cu tur nominado tabata un ganado y a merece un premio pa nan federacion deportivo den
un anochi dedica specialmente na e atleta. Pabien grandi ta bay na Gwennandy Kock, Danon Delamore,
Kyra Hoevertsz, Mikel Schreuders, Alina Kock, Dwayne Chirino, Renze Postma, Thashaina Seraus y
Racing Club Aruba kendenan a sali e ganadonan maximo den Premio Excelencia den Deporte 2015. No
por keda sin menciona e scolnan ganado pa IBiSA como tambe e dirigente y ex-atletanan cu a haya nan
merecido reconocimento durante di e bunita anochi aki.
- See more at: http://www.sportpicsaruba.com/lotto-cu-palabra-di-felicitacion-na-tur-e-ganadonan-den-e-
prestigioso-premio-excelencia-den-deporte-2015/1882#sthash.6ErUWwmi.dpuf