Page 15 - MIN JUS 26 JUNE 2017

ORANJESTAD (AAN) – Den un entrevista cu Matutino DIARIO, Minister di Husticia mr.
Arthur Dowers a menciona cu si un polis bisa cu nan no tabata na haltura di e ley di
2008 (LTU cu ta indica cu polis no mag detene personanan ilegal ni pidi nan
documentonan), e no ta cuadra cu berdad.

Segun e dignatario, polis tabata na haltura di e ley aki y nan a papia tocante e tema y
den diferente ocasion nan a hiba combersacionnan masha amplio, tocante e ley aki y
tur hende ta na haltura cu na 2008 Gobierno di partido MEP a cambia e ley.

Segun e mandatario e esencia di e discusion no ta si polis ta autoriza of no, pasobra
polis por haya autorizacion den un par di minuut pa controla. “Esey no ta e discusion. E
discusion ta si nan por eherce LTU manera e tabata prome cu 2008”.

Prome cu 2008 polis tabata haci control y hopi mas amplio cu e tabata na e
momentonan aki. “Aworaki loke a wordo determina door di gobierno di partido MEP na
2008 nos ta studiando si e por wordo kita”, Minister Dowers a indica.

E mes ta masha critico contra e ley aki, pasobra nan no a hacie mas efectivo. E no
tabata mas efectivo. “Pero locual cu tempo a wordo argumenta pa e Partido MEP ta cu,
segun e tratado internacional, bo no por para tur hende, tur caminda y gewoon pidi nan

pa nan ID. Pasobra si bo ta haci esey, e ta nifica cu hopi di e otro leynan lo cana den
pugna. Pa cana den linea cu e Tratado Internacional aki no ta necesario tampoco”, mr.
Dowers a expresa.

Kiermen, e tempo ey a wordo determina cu e unico caminda cu bo por controla
ilegalidad ta na pia di trabao (negoshinan) of rond di e tereno di esey; sea un tereno
den construccion, un tereno di fabrica, den magazijn, etc. “Eynan bo por eherce LTU”, e
mandatario a subraya.

Esey ta nifica cu tur hende autoriza pa hacie, eynan so nan por hacie tambe. “Kiermen,
bo no por para un auto riba caya y controla si e persona ta legal si of no”, mr. Dowers a
agrega.

Esey semper a existi, y tin momentonan cu polis ta para auto unda cu tin hende cu ta
stuur auto y no tin ningun documento, y esey ta un acto ilegal cu polis por actua riba
dje y hibe warda.