Page 32 - AVP
P. 32
Un bunita alma cu a traha duru cu nos y motiva nos pa hopi decada a bay sosega. Señora
Ellen Croes-Raven tabata un hende cu un bunita alma y un curason grandi y bondadoso.
E tabata un dama elegante, netchi, semper cariñoso y cu un sonrisa riba su cara. E tabata
un bon mama, wela y bisa-abuela, tanta, ruman; un tanta inspirativo pa nos tur. Un señora
fuerte cu principionan solido, cu a scoge tempran den su bida pa saca man y traha pa crea
un miho humanidad y un bunita sociedad pa su isla stima Aruba. Tanta Ellen a demostra
esaki den su bida priva, den su devocion na su fe y kerki, den su trabou social den
comunidad y den su activismo politico den partido AVP. Nos admiracion pe lo corda nos
di dje pa semper!
Tanta Ellen tabata fiel na su partido AVP te na su fayecimento. For di tempo cu mi tata
‘Shon A’ tabata activo den politica, Ellen tambe tabata tey. E tabata un voluntario, cla pa
yuda den tur actividad. E tabata un activista cu Bo no mester a bisa kico pa haci, pasobra
e tabata tin un stimaicon asina grandi pa su pais y tabata compronde bon pa kico su
partido ta lucha. E funcion den cual mas Tanta Ellen a destaca tabata como Presidente di
Comision di Damas di partido. Yama Tanta Ellen un ‘palanca di partido’ ta subraya su
dedicacion y sosten pa tur loke AVP tabata haci.
Cu su caracter cariñoso y argumentonan solido, e tabata convence otronan pa tambe
forma parti di partido AVP y pa e metanan cu AVP tabata y ta para pe: solidarismo cu
nos prohimo, para fuerte semper pa nos pais y traha duro pa crea un miho mayan. Ora mi
a bin di Hulanda na fin di añanan 70 y a cuminsa lanta partido bek di un caida dramatico,
Tanta Ellen a para banda di mi y a yuda mi unda cu e tabata por.
Nos a traha schouder cu schouder pa trece partido bek riba pia. Un bes mas el a tuma
rienda di e Comision di Damas y a pon’e crece y bira activo atrobe den tur cos cu nos a
