Page 11 - IMSAN - MAY 26,2015

Servicio di Ambulance a adkiri dos vehiculo nobo

Monday, 25 May 2015 16:52
Comparti

“ImSan ta sigui renoba su ekiponan. E aña aki a toca turno na Servicio di Ambulance p’asina nan por
sigui transporta e pashentnan lo mas miho y comodo posibel", na palabra dr. Joel Rajnherc, director di
Instituto Medico di San Nicolas (ImSan) cu dentro di poco ta celebra nan di dos lustro.
“Door di e maneho financiero cu a hiba durante e ultimo dos añanan, a logra yega na e dos vehiculonan
nobo di marca Ford”, Dr. Rajnherc ta sigui splica.
Despues di un sondeo extensivo tanto na Merca como na Aruba, pa miho eficiencia a bay over na uza
ambulance di gasolin en bes di diesel.
Danki na e bon cooperacion di e agencia di Ford, esta Yrausquin, awe Servicio di Ambulance ta conta cu
dos ambulance top of the line pa transporta pashentnan.
Un departamento cu ImSan ta hopi orguyoso di dje ta Servicio di Ambulance cu semper a sa di brinda
e miho cuido posibel na e pashentnan. ImSan ta gradici tur cu a apoya/sostene nos departamento di
Ambulance te awor.

Cu e dos ambulancenan nobo aki, Truck 66 y Truck 67, dos cu ta casi nobo y tambe dos cu a wordo
refurbished, e servicio a wordo reforsa adecuadamente.

Door di diversifica e fluho den e tres alocacionnan por garantisa un miho servicio y ta cuadra cu e vision
di ImSan.
E entrega y bautismo di e dos ambulancenan nobo aki, ta marca cierre di e siman
di conscientisacion “Star of Life Celebration” pa e empleadonan den e trabao di salba bida humano.

E siman a inicia diadomingo 17 di Mei cu un bunita santo sacrificio di misa na Brazil y a termina cu un
bunita ceremonia na Ritz Carlton na unda e personal a bin hunto y Pader Jairo a haya e honor di
bendiciona e ambulancenan.

Dr. Monica Nuboer a haci entrega di e yabinan di truck 66, mientras cu Gregory Croeze a haci entrega di
e yabinan di e truck 67 na Liberato Hoek cu ta e hefe di e departamento di Ambulance.
ImSan a reconoce tambe durante e anochi di clausura, Junior Rivero y Melvin Tromp, dos trahado cu a
destaca den nan trabao.
Junior Rivero a specialisa su mes na Hulanda y a traha na un di e ciudadnan cu mas criminalidad y
problemanan psicosocial di Hulanda cu ta Rijnmond, Rotterdam. Junior Rivero ta specialisa y a yuda
den scouting, EHBO, Rode Kruis y a asisti e ekipo di emergencia di refineria Valero.
Melvin Tromp a cumpli cu su specialisacion den Rijvaardigheid di Ambulance cu a wordo haci aki na
Aruba mes bou di guia di instructornan di Hulanda.
E director di ImSan a remarca un biaha mas su satisfaccion pa e profesionalismo di e personal di
Ambulance, nan dedicacion y mas cu tur cos pa e bunita hermandad cu ta existi entre nan.
Teamwork semper ta resultado di bon maneho.
Servicio di Ambulance ta resorta bou di ImSan for di aña 2005. Y danki na e 31 empleadonan specialisa y
awor cu un total di 12 ambulance y 2 bicicleta completamente ekipa na nan disposicion cu Aruba por
conta tur ora riba e miho cuido posibel.