Page 14 - BRANDWEER - APRIL 28,2015

Monday, 27 April 2015 16:14
Comparti

Actualmente ta na Aruba Officier Anna Rodriguez, kende tin 13 aña di experiencia trahando den Cuerpo
di Bombero di Corsou.
E ta un di e instructornan pa e curso pa “Officier” ofreci pa e islanan di Caribe Hulandes bao auspicio di e
academia di Brandweer di Hulanda. Anna Rodriguez a splica cu como cu Corsou tabatin un cursista
participando na e curso organisa pa medio di Brandweer di Boneiro pa islanan BES, Corsou mester a
provee un docente tambe. Despues di a puntra rond a apunt’e pa cumpli cu e tarea aki.
E motibo pa cual a scoge pa tene diferente parti di e curso na e diferente islanan - esta Boneiro, Corsou,
Sint Maarten y Aruba, ta cu cada isla tin diferente obheto unda cu por train cu e grupo.
Tin un total di 11 cursista. Nan ta haciendo nan maximo esfuerso pa eherce nan trabao miho, door cu nan
tin experiencia caba, nan tin conocemento, locual cu nan ta siñando nobo ta pa maneha incidentenan
como Officier, Rodriguez a comenta, añadiendo cu e no tin duda cu e cursistanan lo ta tremendo Officier.
Aruba actualmente no tin hende muhe activo como brandweer y Anna Rodriguez su presencia na e
trainingnan, como instructor y den e rango cu e tin, a hala bastante atencion. El a splica cu como hende
muhe den e profesion di Brandweer e ta experencia retonan, anto trahando den “repressie”, mas ainda.
Di un banda e ta sinti’e sigur pasobra su coleganan masculino tin tendencia di proteg’e y tin biaha hasta
ta proteg’e di mas. Pero, di otro banda e ta sinti cu e ta keda atras den un parti di su desaroyo
profesional, hustamente pasobra nan ta “overprotective”. Na fin di dia, e ta aprecia e gesto di su
coleganan, pasobra e sa cu nan t’ey p’e, Anna Rodriguez a conclui.
Officier Rodriguez a bisa cu e ta spera di por mira mas hende muhe den Cuerpo di Bombero y ta spera cu
lo haci lo maximo pa atrae nan pa traha den e profesion di bombero, el a bisa, mirando den direccion di e
comandantenan di Brandweer di e diferente islanan cu tabata presente durante di e training.
Cuerpo di Bombero Aruba ta existi desde aña 1976, como un departamento independiente. Prome cu
esey e tabata parti di e trabounan di Polis. Awendia e ta conta cu 160 empleado, di cual 112 ta traha
activamente cu combatimento di candela. E empleadonan ta parti den 3 diferente post, situa na San
Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta
varia entre combatimento di candela, rescate, yudansa special y trabounan na aeropuerto.