Page 19 - MIN JUS April 16, 2015
P. 19
Castigonan pa hortamento di auto ta bira mas pisa
Publication: Thursday, 16 April 2015. Categoria: Judicial
ORANJESTAD (AAN): E sospechoso O.M.B.V. mester a presenta dilanti di mesa berde di
huez na corte di husticia di prome instancia recientemente, door cu el a wordo acusa di kiebro y
ladronicia di un auto riba 21 di December 2013.
E acusado no a presenta na corte y huez a puntra su abogado Demis Illes si el a tende algo di su
cliente.
Illes a indica cu e no tabata tin contacto recientemente cu O.V y fiscal a pidi huez pa e caso
wordo trata toch.
Huez a duna su aprobacion y a cuminza cu tratamento di e caso.
Ta asina cu dilanti di un Supermercado, un homber Chines a wak con un persona a drenta su auto
ya core bay cune.
E Chines a subi den auto di su amigo y nan a persigui O.V, kende na dado momento tabata
coriendo cu un velocidad di 120 kilometer pa ora.
Ora cu porfin e sospechoso a wordo gara pa polis, el a bin cu un storia straño.
El a declara cu e Chines a pidie pa bay cu su auto pa cumpra droga pe.
E Chines a bisa cu esey no ta berdad, mirando tambe cu el a haya su mes ta persigui e homber.
Fiscal a indica cu e no ta kere e storia cu O.V a conta.
E fiscal a mustra tambe riba e hecho cu den pasado O.V a yega di haya un castigo pisa di 5 aña
door di e comete un atraco arma.
Banda di esey tin varios otro delito riba su carchi di castigo.
Fiscal a splica cu tin un maneho nobo pa locual ta hortamento di auto, unda cu ta bay cuminza
exigi castigonan mas pisa pa esaki.
El a indica cu e lo por a exigi pa e acusado hasi oranan di trabao comunitario, pero mirando cu
mas y mas ta birando obvio cu ladronicia di auto ta algo hopi serio, el a dicidi di exigi un castigo
di prison di 2 luna contra e sospechoso.
Huez mes a bisa na final cu e tabata pensando cu un castigo di 3 luna lo ta na su lugar, pero
como cu ta trata di un caso bieu, el a bay di acuerdo cu exigencia di fiscal y a condena O.V na un
castigo incondicional di 2 luna.
