Page 4 - Garage Cordia

Comunidad di Aruba ta uni pa realisa un soño di Fundacion
Mi Por

Tuesday, 26 May 2015 19:34
Comparti

Hotelnan RIU y Garage Cordia ta entre e tantisimo sponsornan cu a yuda Fundacion Mi Por realisa un
soño masha grandi pa haci un diferente enorme den bida di mas di 30 mucha y nan famianan. Diamars
mainta, cu e entrega di e yabinan di un van, na un balor di casi 200 mil florin,

cu ta acomoda seis rolstoel, boluntarionan di e fundacion a hala un rosea grandi di alivio cu awo nan por
yuda tur nan muchanan cu transporte pa bay nan terapia, bishita nan dokter, etc.

Richard Velasco, kende ta gerente general di RIU Palace y RIU Antillas, a representa e rumannan
Carmen y Luis Riu na entrega di e bus, cu a tuma luga na Garage Cordia. El a subraya cu a rekeri un
esfuerso enorme di parti di e fundacion y cu pa RIU tabata un honor pa contribui cu e bon causa aki. E
hotelnan na Aruba a concentra pa hopi tempo riba construccion, empleo di mas di 780 persona, y mas
detayenan mas tecnico, y no a concentra mucho pa cu nan contribucion na e comunidad di Aruba mes,
Velasco a bisa.

Tabata durante di un bishita recien di e rumannan Carmen y Luis Riu na Aruba, cu Carmen Riu a expresa
despues di un recorido di e isla, cu ademas di e inversion di negoshi na nos isla nan kier contribui na e
comunidad, nan kier forma un parti mas integral di e comunidad, parti di e famia di Aruba. Pa medio di
abogado di e hotel, esta Ronny Wix, via di e director di operacion di e hotel nan a wordo informa tocante
di e gran labor di Fundacion Mi Por y a dicidi pa yuda cu e suma cu nan tabata falta pa adkiri e bus.

Velasco a subraya cu tabata tin hopi otro sponsor, cu durante di dos aña a haci nan contribucion pa
realisa e soño aki, entre otro abogadonan, Garage Cordia mes y gobierno, cu no a cobra invoerrechten
riba e bus.

Gerente general di Garage Cordia, esta Danilo Werleman a splica durante di e ceremonia di entrega cu e
compania ta contento pa entrega e bus y lo sigui contribui cu e mantencionnan y monitor e bus pa asina
mantene semper riba caminda pa e muchanan.

Werleman a agrega cu e bus ta carga seis rolstoel pa mucha y/of hende grandi y ta ful ekipa cu un lift y
otro detayenan necesario. E contribucion di Garage Cordia ta tambe den e prijs, cual nan a baha te na
“kost” pa asina e Fundacion Mi Por awo ta riba caminda cu nan mesun bus.

El a conclui expresando palabranan di gratitud na tur persona y instancia cu a haci un contribucion pa
Mi Por yega na nan propio bus.