Page 2 - Digicel

28 Djaweps 26 Novèmber 2015

ON YOUR MARKS!

Federashon di atletismo di Kòrsou, Curaçaose Atletiek
Bond, kier a yama primeramente danki na direkshon i
redakshon di Extra pa inisiativa i espasio duná na e.o. e
deporte di atletismo di por komuniká ku e pueblo di Kòrsou
amante di deporte, pero e deporte di atletismo en partikular.

E espasio aki sigur lo sirbi pa nos yega mas serka di
nos atletanan i nan mayornan, nos klupnan, fanátikonan
di deporte di atletismo i tur nos hendenan ku tin amor pa
deporte.

Atraves di kasi mitar dékada e bin ta pone Kòrsou den
moveshon pa asina dun’é deporte su lugá meimei di otro
deporte deportenan. Atletismo, é deporte mama ta e deporte
ku ta ser praktiká na edat chikitu i bo ta sigui praktiká
esaki te na grandi. Esaki ta hasi atletismo tambe é deporte
mas bieu na mundu.

Ademas di ta un dje deportenan ku ta ser praktiká dor di
tur sekso, e ta tambe e deporte ku ta ser praktiká tambe pa
esnan ku tin defisiensia mental i físiko. Atletismo ta forma
base pa hopi otro deporte.

Apesar ku mayoria di su eventonan ta individual e
tin tambe eventonan di “tim”. Imaginá bo mes Weganan
Olímpiko sin atletismo. Atletismo ta é deporte mas
elektrisante durante Weganan Olímpiko.

Durante e fin di siman benidero federashon di atletismo
konhuntamente ku fundashon Run in the Sun ku su
partnernan, ta bai regalá Kòrsou su di dos edishon di KLM
Marathon.

For di aña pasá e evento aki a demostrá ku e ta un hoya
di evento. E aña’ki lo tin alrededor di 1700 partisipante
for di mas ku 30 pais, djis pa menshoná China, Slovenia,
Fransia, Brasil, Argentina, Merka etc.

Naturalmente nos tin diferente atleta lokal kompetiendo
den e evento aki. Debí na nan edat nan lo no ta den
kontienda riba e distansianan largu, pero si nan ta bai midi
forsa ku otro kompetidor internashonal riba e distansianan
di 5 km i 10 km.

E atletanan lokal ku ta primintí di duna un bon bataya
riba e distansia di 5 km ta: Yohance Valks i e damitanan
Qyone Antersijn i Shardiela Eisden. Rashid Rosalina i
Waldemar Nahr lo den kompetensia riba e distansia di 10
km.

E veteranonan Glenn Mac Donald i William van
Heyningen lo ta den e kompetensia aki riba e distansia di
mitar máratòn. Tur nos e atletanan aki ta kargadó di marka/
rekòrt di Kòrsou òf tempunan signifikante den eventonan
di distansia largu tantu lokal komo internashonal.

Durante e último di My Guardian Group na òktober
último e atletanan Valks (16), Nahr (31) i Rosalina (20)
a finalisá un tras di otro pa di 3, 4to i 5 lugá over-all ku
tempunan di respektivamente 36:50, 37:31 i 37:38.

Qyone Antersijn 17) tabata e di tres dama ku a krusa e
meta final. El a hasi esaki den 45:56. Mirando e prestashon
di nos atletanan na un edat relativamente hóben, Kòrsou
por spera hopi di nos atletanan den futuro serkano pa loke
ta trata distansia largu!

Un pueblo deportivo ta un pueblo salú físikamente i
mentalmente.

Te otro siman ku Dios ke.