Page 16 - AWEM 21-Apr-2015

16 AWEMainta Diamars, 21 April 2015

‘Auction’ di pinturanan basa riba potretnan di Astronaut André Kuipers

A recauda rond di 30 mil florin pa Colegio
Laura Wernet Paskel

PRESENCIA di Astronauta André Kuipers na un evento di subasta

di cuadranan na Alhambra, na beneficio di Colegio Laura Wernet
Paskel, a percura pa un recaudacion substancial cu ta permiti e
scol sigui cu construccion di un Biblioteca Moderno p’e scol. E dia
despues di su evento, Kuipers tabata di bishita cerca Prome Minister
Eman. Kuipers mes no por a kere cu e potretnan cu el a saca for di
espacio lo por a sirbi pa un causa asina bunita cu ta beneficio di un
scol na Aruba. E anochi aki na Alhambra el a presenta como un co-
moderador dunando splicacion di cada un di e casi 60 cuadranan
cu a wordo pinta dor di artistanan local, inclusive Minister Michelle
Hooyboer-Winklaar, basa riba e potretnan cu el a saca durante su
estadianan den espacio abordo di e International Space Station.

“Mi tabata sorprendi cu tin algun hende a pidimi pa firma e cuadra
cu nan a cumpra, apesar cu mi no tabata esun cu a pinta nan.
Pero esaki atrobe ta duna e cuadranan un poco mas di balor,” e
ex-Astronauta a comenta na salida for di un bishita cu el a realisa
diadomingo mainta na Oficina di Prome Minister Mike Eman.
Y a agrega “cu tabata masha bunita pa mira den e pintura con cada
artista a duna nan interpretacion n’e potretnan cu mi a saca for di
espacio.” Tabatin hopi interes for di tur banda di sala riba cada un
di e cuadranan cu tabata na benta. “Esaki sigur tabata un iniciativa
bunita di e scol pa recauda fondo y pone atencion n’e tema di
proteccion di nos mundo pa futuro generacionnan,” Kuipers a bisa
diasabra anochi tambe.

El a bisa cu ta masha importante cu muchanan ta haya un bon
educacion y cu e placa cu a wordo recauda ta bay pa construccion
di un Biblioteca y su inventario, esta tur loke cu ta necesario p’e
funciona como tal. E suma cu a keda recauda ta rond di 30 mil florin.
Diadomingo durante e bishita di casi un ora largo serca Prome
Minister Eman, a intercambia di pensamento riba su anterior bishita
na Aruba p’e Green Conference, pero tambe kico ta den preparacion
p’e siguiente edicion di e conferencia cu ta trata temanan di maneho
sostenibel.

E maneho di sostenibilidad cu Gobierno di Aruba ta hibando ta algo
cu e ta admira y kier sigui cu e cooperacion cu el a brinda te awor.
E mes a splica di lo desea pa bolbe Aruba pronto, pero cu su famia
pa vacacion, aunke su yiu a biba un aña riba e isla caba y semper a
keda encanta cu Aruba.