Page 8 - AWEM 21-Apr-2015

8 AWEMainta Diamars, 21 April 2015

FREE WI-FI

awo den henter
Hospital

DR. Horacio E. Oduber Hospitaal ta anuncia cu despues di a

pasa den un proceso di renobacion completo di nan website,
www.arubahospital.com tin un apariencia fresco y moderno, a
wordo traduci pa Ingles y tin hopi mas informacion den diferente
idioma pa medio di foyeto.

Basa riba e perfil online di bishitantenan riba e website www.
arubahospital.com, Dr. Horacio E. Oduber Hospital a tuma e
decision pa haci cambionan grandi n’e website.
A nota cu mayoria bishitante riba e website ta di “p’afo di Aruba”
y e informacion cu ta mas busca: T’e servicionan medico cu
hospital ta ofrece y kico t’e rekisitonan y procedura pa solicita pa
un trabao na nos hospital.
Consecuentemente a dicidi pa presenta e website na Ingles,
pasobra anteriormente e tabata completamente na Hulandes y
ta poniendo den transcurso di luna un cantidad grandi di foyeto
den diferente idioma, cu un focus completo riba e pacientenan y
bishitantenan.

Un punto di interes hopi grandi for di e bishitantenan di exterior
t’e servicio di “vacation dialysis” pa pacientenan di dialyse di
exterior cu kier bin Aruba y mester sigui ricibi nan tratamento
medico, segun Charlaine Alexander-Huntington ta splica.
Un otro topico cu ta hala hopi atencion t’e Departamento di
Spoedeisende Hulp (Emergency Room), unda cu riba e website
ta splica tanto pa nos localnan como pa turistanan ki ora ta bon
pa bishita SpoedEisende of ki ora ta mihor pa nan bishita un
dokter di cas.

Tambe e website ta inclui orarionan di bishita y tur excepcion
y cambio den esaki. E “tab” di “Building Better Care” ta hopi
interesante pa tur persona cu kier keda na altura di tur desaroyo
pa cu e construccion y expansion di Dr. Horacio E. Oduber
Hospital.
Riba www.arubahospital.com tambe tin un servicio cu ta pone
un sonrisa riba cara di e pacientenan di hospital, esta “send an
e-card”.

Si bo tin un conoci of ser keri cu ta den hospital y bo kier dese’e
un feliz dia, un pronto recuperacion, desea su baby bon-bini of
manda un saludo pa su hacimento di aña, mand’e un e-card.
E carchi ta wordo imprimi y entrega n’e paciente, e sorpresa di un
atencion bunita asina semper ta pone un sonrisa riba e paciente
su cara y ta yuda dun’e un “boost” pa su recuperacion.

Pa duna mas realse n’e experiencia di e paciente y bishitantenan
di hospital, Charlaine Alexander-Huntington a anuncia tambe cu
e proyecto di Free Wi-Fi pa ful hospital cu nan tin un tempo bezig
cun’e, ta cla.

Paciente y bishitantenan awor por simplemente “log in” como un
“HOH guest”, acepta e “agreement” y reglanan y automaticamente
ta haya aceso na Internet completamente gratis.
E website di hospital ta sigui dinamico, cu introduccion di mas
informacion importante, cu un proyecto andando pa introduci
tur e specialistanan medico cu ta traha cu hospital y cu foyetonan
di informacion. Bishita www.arubahospital.com y sigui tur
desaroyo tumando lugar na nos hospital.