Page 21 - download

AWEMainta.com DIABIERNA 31 DECEMBER 2021| 21

UN SNECHI DI PALABRA DI DIOS

DIADOMINGO DI EPIFANIA 02.01.22 #344

I lectura Is. 60, 1-6

Salmo 72

II lectura: Ef. 3, 2-3.5-6

Evangelio: Mt. 2, 1-12

Hesus a nace na Betlehem den region di Hudea, tempo Herodes tabata rey. Dijs despues algun homber sabi di oriente a
bini Herusalem. E sabionan a puntra: “Unda e yiu recien naci, e rey di Hudiunan, ta? Nos a mira e strea cu ta anuncia su
nacemento, sali y nos a bini pa dun’e homenahe.” Ora Herodes a tende loke nan a bisa, el a bira tur exalta y tur habitante
di Herusalem tambe. El a yama tur gransacerdote y doctor di ley Hudiu hunto y a puntra nan: “Unda e Mesias lo mester a
nace?” Nan a contest’e: “Na Betlehem den region di Hudea. Pasobra esaki ta loke Dios a bisa pa medio di su profeta: ‘Y abo
Betlehem den region di Huda, di ningun manera bo no ta esun menos importante entre cuidadanonan di Huda.

Pasobra for di bo lo sali un gobernador, cu lo guia mi pueblo Israel como wardado.’”

Herodes a yama e sabionan di oriente den secreto cerca dje y a informa ki tempo exactamente nan a mira e strea aparece.
Despues el a manda nan Betlehem y bisa nan: “Investiga exactamente unda e mucha ta y ora boso hay’e laga mi sa ya mi
mes tambe por bay dun’e homenahe.” Despues cu e sabionan a ricibi e instruccionnan aki di e rey, nan a bay. Anto nan a
bolbe mira e strea cu a aparece na oriente. El a bay nan dilanti te caminda e mucha tabata y a keda para riba e luga ey. Ora
nan a mira e strea, nan a bira masha contento. Nan a drenta y haya e yiu cu su mama Maria. Nan a cay na rudia duna e yiu
homenahe y presenta nan regalonan, esta oro, sencia y mira. Despues e sabionan a bolbe bay nan tera via un otro ruta,
pasobra Dios a adverti nan den un soño pa no pasa mas cerca Herodes.

Palabra di Señor.

MENSAHE

E palabra “Epifania” kiermen manifestacion. Ta trata di manifestacion di Hesus. Si den pasado Dios a
manifesta su mes di un forma spiritual of den nubia, candela of otro materia, awor E ta manifesta su
mes den curpa humano. Solo, candela, awa tabata spierta respet di humanidad sea pa su forma vital
of destructivo. Toch hende a sinti respet pa e manifestacion aki, pasobra nan tabata refleha forsanan
extraordinario. A pesar cu hende a keda crea na imagen y semehansa di Dios y ta superior riba tur
otro criaturanan toch humanidad tin dificultad pa acepta cu Dios ta manifesta su mes den un persona
humano.
No ta sin rason evangelio di awe ta yama e hende cu a yega cerca niño Hesus sabinan, pasobra nan ta reconoce Dios den
un ser humano recien naci, indefenso. E sabinan aki a usa tur recursonan accesibel y donnan ricibi pa haya Dios. Di igual
manera nos mester usa tur recurso accesibel y nos inteligencia pa yega cerca Dios. Esey ta actitud di hende sabi.
E tres regalo cu e sabinan a ofrece na Hesus: sencia, oro y mira ta expresa cu nan a reconoce como Dios, Rey y Salbador.
Dios a manifesta su mes den curpa humano.
Hesus ta revelacion perfecto di Dios Tata. Asina tambe cada un di nos como Dios su criatura y yiu di Dios mester trata
reconoce Dios den nos prohimo como tambe bira un manifestacion di Dios pa cu otro.
Si awendia mundo ta sinti ausencia di Dios ta pasobra poco hende ta manifesta Dios su presencia y santidad cu nos bida.

ORACION

Gloria in excelcis Deo!

PROPOSITO

Pone mas atencion riba parti spiritual y divino di nos persona.