Page 70 - MIN VOS 31 JULY 2015

Hygienische Dienst mesora a bay controla Panaderia cu a
bende pan cu bichi aden

Publication: Friday, 31 July 2015. Categoria: General
Autoridad a manda dos victima haci test mesora!

ORANJESTAD (AAN): Tabata Diahuebs alrededor di 10’or di mainta, cu dos dama local a
acudi na un Panaderia pa asina cumpra dos sandwich cu ta conoci eynan como “Pan Hawaiiano”.
Despues di a cumpra y paga pa esaki, e dos dama a cuminza come. Uno di nan a come su Pan
Hawaiiano completamente sin sinti nada. Sinembargo ora cu el a finaliza su pan completo, el a
sinti su stoma ta haci raro, y inmediatamente a ripara cu e sandwich a cay malo pe.
Pero e momento ey, e no tabata sa nada ainda.
E di dos victima tambe tabata comiendo su pan aun mas poco-poco, y e tabata bayendo pa mitar
caba, y casi ta cabando ora el a habri e sandwich un tiki, y topa cu un monton di bichi den e pan.
E victima a haci bon, di lora e pan bek den papel, y siguiendo conseho di hendenan, el a acudi
mesora na Gezondheidsdienst na Playa, pa asina presenta na Hygienische Dienst. E oficialnan
mesora a wak e pan, a examina esaki pa determina si no ta intencional el a ser haci.
Pero ora nan a wak detaye cu ta mustra cu ta for di e Panaderia mes e bichinan aki a origina, e
oficialnan a laga nan skirbi informe, y informa e dos damanan, cu urgentemente nan tin di bay
haci test di Laboratorio.
DIARIO a compronde cu tur dos dama a ser manda pa haci Test di Parasito.
Mientras tanto e Pan Hawaiiano a keda confisca door di oficialnan di Hygienische Dienst.
Pa exactamente 2:15 pm, DIARIO a nota cu un oficial di Hygienische Dienst a yega na e
Panaderia cu ta keda cerca di Rotonde di Tanki Leendert pa asina busca informacion, y tambe
check e condicion di e negoshi. Te na cierre di edicion, DIARIO no a haya sa si acaso e
Panaderia a haya multa. Hecho si ta cu a mira cu e Panaderia no a wordo cera.