Page 5 - FUND MUS AUA MARCH 7,2016

Fundacion Museo Arubano a topa cu Mondriaan Fonds

Sunday, 06 March 2016 16:00
Comparti

Fundacion Museo Arubano a tene un reunion masha fructifero cu Mondriaan Fonds na Hulanda, den
cual e delibera riba plannan andando pa museo Industrial y Museo di Comunidad, cu lo habri su
portanan e aña aki ainda. Den ambos proyecto, separa di otro partnernan, tambe ta buscando sosten di
Mondriaan Fonds di Hulanda, cu entretanto a sostene varios otro proyecto y iniciativa riba nos isla.

Probechando di e bishita na Hulanda, Fundacion Museo Arubano a dialoga tambe cu Mondriaan Fonds
riba diferente posibilidad pa inverti mas den e area cultural na Aruba por medio di proyectonan, entre
otro. E fundacion a mustra interes den e plannan di e fundacion, pero specialmente den e vision di FMA,
cu ta haciendo hopi esfuerso pa uni e museonan pa hunto subi pa e siguiente nivel den desaroyo y
innovacion.

Un di e rolnan di Fundacion Museo Arubano ta aspecto di financiamento, den cual lo organisa
organisacionnan internacional, manera por ehempel Mondriaan Fonds, pa partner cu FMA den algun
iniciativa specifico. Mester bisa cu tin plannan grandi y sigur positivo riba e tereno aki.

E structura di Fundacion Museo Arubano ta data for di aña 1992, pero na 2015 a conoce cambionan
structural cu ta haci posibel pa pone 5 museo hunto bao di un organisacion. Ta trata aki di e Museo
Historico (Fort Zoutman, Oranjestad), Museo Arkeologico (Ecury Complex, Oranjestad), Museo di
Comunidad (Nicolas Store, San Nicolas), Museo Industrial (Watertoren, San Nicolas) y Museo di
Carnaval (San Nicolas). Museo di Comunidad y Museo Industrial ta programa pa habri na aña 2016 y
Museo di Carnaval lo habri na 2017.

E idea general ta pa trece museonan mas cerca di comunidad y ta trahando pa reenforsa tur museo pa
hisa e calidad y logra pa nan yega na e nivel di Museo Arkeologico, cual ta reconoci como un di e miho
museonan di Caribe.

Fundacion Museo Arubano tin su oficina principal situa na Zoutmanstraat # 1. E fundacion ta conta cu
sosten financiero di varios instancia, entre otro di Aruba Ports Authority cu ta cobra cada pasahero riba
crucero un "fee" special cu ta bay entre otro pa promove nos museonan.

Riba e foto adhunto por aprecia Consehero di Minister, Indra Zaandam, ehecutivo di Mondriaan Fonds,
Joost Vrieler, director di Fundacion Museo Arubano, Anky Vrolijk y representante di Arubahuis riba e
tereno cultural, Angelo Tromp.

Comentarionan (0)

Mustra/Kita comentarionan