Page 3 - AVB

30 AWEMainta Diaranson, 18 April 2018

Deporte

Riverplate ta derota Nacional den futbol

femenino cu hattrick di Margenine Kock

DIALUNA anochi e campeonato di futbol femenino di Arubaanse Voetbal
Bond - AVB a continua den stadion Guillermo Trinidad unda e ekiponan di
Riverplate y Nacional a topa otro. Mester bisa cu pa Nacional esaki ta nan
prome campeonato den futbol femenino pues nan ta pasando den un proceso
y experencia mientras nan ta lucha contra e mihonan. Nan tin un ekipo
hoben y pa otro anja no tin duda cu nan lo por duna mucho mas bataya cu
un miho tecnica y tactica di wega. Di otro banda Riverplate tin un ekipo
basta stabilisa cu tremendo hungador. Den e campeonato actual ya caba
nan a sa di piki victoria contra di e dos grandinan esta Britannia Damas
y Rca Damas.
Den e partido di ayera contra Nacional, e ekipo Rioplatense a sali brabo
unda den e prome tempo nan a anota 4 gol mientras cu den e di dos tempo
nan a anota 3 gol mas pa e partido finalisa 7 - 0. E golnan di Riverplate a
wordo anota pa Donna Luitjes, Margenine Kock 3x, G’leen Schwengle y
Münjeuline Tromp 2x. Cu e victoria aki Riverplate Aruba ta cla pa bataya
den e playoff final aki unda cu nan lo ta contenedor pa e titilo campeonil.